Home » MEP: “Un biaha mas ta ser comproba cu Mike Eman ta biba di mentira, falsedad y intriga pa dividi e pueblo Arubano”

MEP: “Un biaha mas ta ser comproba cu Mike Eman ta biba di mentira, falsedad y intriga pa dividi e pueblo Arubano”

by Admin
0 comment 64 views

Un di e locura y mentiranan cu fin di siman pasa a ser vocifera pa e lider di AVP, Mike Eman y cu el a haci den Santana na Playa ta cu e gobierno actual lo a kita un parti di e Watty Vos Boulevard y pa nombra “Sasakiweg” den “Avenida Nelson Orlando Oduber”. Aki Mike Eman a haci como sifuera cu e caretera di “Sasakiweg” a ser construi na 2017, esta den e mesun temporada cu a cuminsa construi Watty Vos Boulevard, siendo cu tur hende cu sano huicio sa cu tabata na 1983 e Sasakiweg a inicia cu construccion bao di Bestuurscollege di MEP y cu sr. Nelson Oduber como e diputado encarga. E caretera principal aki a termina na augustus 1985, pues 34 aña pasa.

Locura di Mike Eman
Alabes den su locura Mike Eman faltando respet te hasta pa e difuntonan den Santana a trece un gran cantidad di disparate mas pero cu no ta bal la pena pa MEP reacciona riba esakinan.
Pero locual siguramente nos partido ta contraaresta cabalmente ta e asunto di cu “Sasakiweg” tambe ta hinca den e plan total di construccion di Watty Vos Boulevard. Nos tur por corda ainda cu semper e politiconan di AVP tabata declara cu e Watty Vos Boulevard ta cuminsa na Aeropuerto y ta termina te na e luznan di trafico banda di Fatum y Sun Plaza Mall, caminda esaki lo bay conecta riba Juan Yrausquin Boulevard.

Di Aeropuerto pa Punta Brabo
Pa comproba esaki partido MEP ta presenta e prueba di informacion den e propio documentonan di e proyecto Watty Vos Boulevard caminda tur hende y Mike Eman tambe por lesa cu e boulevard aki lo cuminsa na e turbo rotonde existente na Sabana Blanco y ta bay door di e barionan di Meiveld, San Barbola, Seroe Patrishi, Tanki Leendert, Ponton, Bushiri y ta yega te na e crusada di Punta Brabo. Pues ningun momento ta hinca den e plan cu “Sasakiweg” tambe ta incorpora den e Watty Vos Boulevard! Y pa completa e storia mentiroso di Mike Eman, te hasta e sobrino di Watty Vos den su discurso di ponemento di prome piedra a confirma esaki, esta cu e Watty Vos Boulevard ta finalisa na crusada di Fatum cu Juancho Yrausquin Boulevard.
Por lo demas, partido MEP ta keda te aki y no ta sigui perde mas tempo cu e locuranan di Mike Eman y su pandiya.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio