Manera ta conoci, un di e metanan principal di Minister Chris Romero tabata pa restructura y optimalisa e compania estatal Arubus NV. No ta un secreto cu e compania nacional di transporte publico ta experienciando retonan considerabel den e ultimo añanan. Pa cu esaki Gobierno di Aruba a haci e compromiso di inverti den un flota nobo di bus pa Arubus NV, pa asina e compania aki por sigui brinda su servicio na nos comunidad, pero na un manera mas optimal.
Despues di un proceso largo pa escohe busnan cu ta mas apropia y cu ta cuadra cu e exigencianan di nos pais, finalmente e prome grupo di e flota nobo di bus pa Arubus NV a yega Aruba. “Aña pasa durante e tratamento di presupuesto pa pais Aruba, Gobierno di Aruba a aloca un fondo pa asina rehubenece e flota di bus di Arubus. For di e tempo ey pa awor nos a pasa den un proceso extenso pa asina logra yega na un flota di bus nobo cu ta cumpli cu e demanda di nos pais. Mi a tuma e tarea pa supervisa e proceso aki di serca pa asina sigura cu Arubus NV por a haya busnan di calidad halto y moderno, pero na un mihor prijs”, Minister Chris Romero a duna di conoce.
E busnan nobo aki ta di e cas automotriz Mascarello y e motor cu e chasis ta di e compania Volkswagen/MAN. E flota nobo ta ekipa cu airco, WiFi y ‘charging ports’, pero loke ta un di e beneficionan mas grandi di e busnan aki ta cu nan ta e prome vehiculonan na Aruba cu ta core cu Euro 5, cu ta un tipo di combustibel limpi cu no ta daña nos medio ambiente. “Mirando e mundo moderno cu nos ta bibando aden, pero tambe tumando na cuenta cu tecnologia y comunicacion ta un parti esencial di e ser humano di awe, nos a dicidi pa busca busnan cu ta brinda un servicio extra na e usuarionan, sin cu mester afecta e tarifa actual. Pa es motibo a haci enfasis riba e importancia pa e flota nobo aki ta ekipa cu airco, WiFi y ‘charging ports’, pa asina facilita e biahe di e usuario cu haci uzo di Arubus NV su servicio. Pero loke tabata algo sumamente importante y esencial pa a escohe e tipo di busnan aki ta cu nan ta core riba Euro 5, cu ta un diesel limpi y cu no ta daña nos medio ambiente”, Minister Chris Romero a sigui bisa.
Siguientemente e busnan nobo di Arubus NV tin cu pasa den un proceso di adaptacion pa asina nan por cuminsa brinda servicio na nos comunidad. Den algun dia por cuminsa wak e prome grupo di bus aki riba caminda caba, den espera di e siguiente grupo cu lo yega Aruba dentro di algun siman. “Nos meta ta pa e flota completo ta na Aruba na cuminsamento di otro aña. Nos ta papiando aki di 30 bus nobo, di calidad halto y cu accesibilidad cu ta adapta na e necesidad di cada pasahero cu haci uzo di Arubus NV su servicio”, Minister Romero a culmina bisando.