J.G. Emanstraat, Oranjestad: Diasabra den careda di 6’or di atardi por a mira un algomeracion di mirones, brandweer, polis y ambulance den J.G. Emanstraat dilanti e edificio di Corte. Informacion a drenta cu un dama no ta dunando señal di bida den e edificio blauw, unda tin varios di Adicto ta biba, cu ta keda net patras di Mi Chalila.
Net pariba di Mi Chalila tin un entrada, cu ta bay na e edificio Blauw bandona aki.
Na yegada mesora e personal di ambulance a bay trata e dama y a logra rebiba e dama aki y cu hopi urgencia nan a transport’e pa hospital, su situacion ta hopi critico.
Dos unidad di Brandweer, dos patruya di Polis y tres Ambulance a presenta na e sitio. E no tabata facil pa localisa e victima, e tabata riba e di dos piso. Nan a logra drenta den e edificio y a subi riba e di dos piso, caminda enberdad nan a topa cu e dama for di tino benta riba vloer y no lo tabata tin pulso.
Personal di brandweer mester a kibra un porta pa asina por a drenta paden, tambe e personal di brandweer y e agentenan policial mester a yuda e personal di ambulance pa baha e dama for di e di dos piso y sak’e for di e edificio.
Segun un adicto cu ta biba den e edificio aki, a conta cu tin mas o menos un 25 adicto ta biba eyden, sin conta e cumpradornan di droga cu tur dia ta drenta eyden pa buska nan droga. E ta calcula cu pa dia lo tin un 200 cumprado ta drenta eyden pa busca nan droga.
E victima lo ta un dama local, ta calcula cu e ta den careda di 40 aña di edad y na e sitio por a scucha cu e victima su nomber lo ta “Diana”.