Home Politics Parlamentario Endy Croes: “Lo entrega un mocion den proximo reunion pa...

Parlamentario Endy Croes: “Lo entrega un mocion den proximo reunion pa cambia Statuut di tur compania estatal haciendo nan AVP proof”

SHARE

 

 

Parlamentario Endy Croes den conferencia di prensa a splica cu den e proximo reunion publico cu sigui awor den augustus lo percura pa entrega un mocion den nomber di Fraccion di MEP pa gobierno cuminsa e proceso pa cambia Statuut di tur compania estatal y percura cu pa 2021 esakinan ta cambia y ta cla. 

 

Segun Parlamentario Croes den e ultimo veredicto di Hues alrespecto e caso di Lotto, Hues a duna Lotto rason pa cu e cambionan di statuut. Nos semper ta respeta veredicto di Hues y lo haci uso di e veredicto aki pa nos peticion mediante un mocion den Parlamento na gobierno. Activistanan di AVP nombra pa ex ministernan di AVP como miembronan di bestuur di Lotto a cambia Statuut di Lotto dia 17 di october 2017, esta casi un luna despues di eleccion y a haci esaki cu ayudo di Profesor Kunneman y un oficina di abogado unda esaki a previligia esnan cu ya a sinta den dicho hunta.

 

No obstante cu e mesun personanan aki a cumpli 2 termino den bestuur y di acuerdo cu Good Governance Code despues di 2 termino di 4 aña bo no lo por bin bek, pero cu e cambio aki di statuut nan periodo a cuminsa core di nobo y e mesun personanan activistanan di AVP cu a cumpli 8 aña awor a continua y lo por bay 8 aña mas. Parlamentario Croes a continua splicando cu e mocion cu lo bay wordo entrega ta pa expresa e deseo na Gobierno pa Gobierno usa copia di e mesun statuut nobo aki di Lotto y cambia statuutnan di tur otro compania estatal manera Setar, AAA, APA, Utilities, WEB, ELMAR, RDA na e mesun formato aki. 

 

Despues di haci e cambionan aki Gobierno actual lo nombra su expertonan den tur e Directivanan aki di acuerdo cu e Statuut nobo y asina logra haci e companianan estatal aki “AVP Proof” pa e proximo 20 añanan. Parlamentario Croes ta di opinion como cu e statuto aki a pasa su toetsing cerca y tin veredicto na su fabor no lo ta ningun problema pa procede cu esaki y asina garantisa cu mentenan coruptivo liga na AVP keda leu di Companianan Estatal y Fundacionnan di Gobierno. Spera cu pronto e bala por cuminsa lora!