Home Politics Parlamentario Endy Croes: CAFT kier un control cu Djente “Hulanda tabata tin...

Parlamentario Endy Croes: CAFT kier un control cu Djente “Hulanda tabata tin ‘bosal’ bisti pa controla Mike Eman y AVP”

SHARE

Parlamentario Endy Croes ta indigna cu Hulanda na e manera cu Hulanda kier impone riba gobierno actualmente. Parlamentario Endy Croes ta splica cu netamente Hulanda ta co-culpabel pa e situacion cu AVP a hinca Aruba aden. Ta un secreto publico cu Mike Eman y AVP a redobla e debe nacional di Aruba. Ta un secreto publico cu Mike Eman y AVP a maneha pais Aruba den un fantasia luhoso unda cada aña tabata ricibi “aprobacion di Hulanda” pa presta miyones bay gol pa cubri e deficitnan extravagante cual entre otro a causa e Mega Debe. Adhunto e tabel di Banco Central pa pueblo por mira y huzga pa su mes e deficitnan monstruoso. Hulanda na 2014 a gaña “trek aan de bel” y a duna Mike Eman un Koninklijk Besluit, esta e famoso KB. Mike Eman a bay bati wea cu su gang di Alibaba dilanti cas di Gobernador cu gritonan di desesperacion “firma awor”. Prohibi pa lubida! Den e proceso aki Mike Eman “wrong and strong” a bay den welga di hamber bebiendo “Ensure” tur anochi bao di e famoso tent. Mike Eman kier bay cielo pero no kier muri. Que Lider burumbundi y di di panlefi! Hulanda e momento ey a drenta y a forsa Parlamentarionan zwak di AVP aproba un Ley LAFT contra nos constitucion y contra conseho di Raad van Advies entregando asina un parti di nos Status Aparte.

Betico a alerta pueblo
Nos lider inmortal Betico Croes a laga un mensahe atras despues cu el a cristalisa e lucha pa Status Aparte na su yegada na aeropuerto maart 1983, esta ‘cu dia locual nos a logra awe esta e Status Aparte wordo menasa, esaki ta significa guera’. Betico Croes a alerta pueblo cu e logro di e Status Aparte mester wordo trata manera un klompi di diamante. Betico tabata agradecido inmensamente na e pueblo kendenan e tempo aya a sostene e lucha atrabes di sodor, sanger y lagrima incondicionalmente den e fase pa realisacion di nos Status Aparte. E grandinan cu a wanta kincena na cantidad tabata pa amor di e causa y e lucha. Danki na e balentia di nos grandinan cu awe nos tin nos Status Aparte y cu awe nos tin posicionnan manera Minister y Parlamentario y nos por ta Baas den nos propio cas. Nos tin nos propio himno y bandera. P’esey nunca pero nunca nos por bira lomba pa nos historia y ta bon pa nos grandinan inculca den nos futuro generacionnan e balornan di e lucha y di nos Status Aparte.

Mike trata cu handschoen di felpa
Segun Parlamentario Endy Croes e politiconan hoben y sin fundeshi na Den Haag ta faltando respet pa esaki. Den Haag a bin cu un Supervision pa AVP, esta CAFT unda Mike Eman y Parlamentarionan “fofo” di AVP a doblega apesar cu esaki tabata contra constitucion aceptando esaki cu un grito di “Ja Baas”! Mike Eman a wordo trata cu handschoen di felpa despues di esaki. Hasta despues cu Mike Eman a yama e Hulandesnan pa “verkrachters”, algo cu nunca MEP lo haci, Hulanda a recompensa Mike pa e representa Hulanda entre otro na Nacionnan Uni. Prohibi pa lubida! CAFT a bin cu djente falso y bosal pa Mike Eman. Bao di presencia di CAFT e debe nacional di Aruba a keda aumenta. Momento CAFT a drenta e tabata rond 75% y na 2017 el a “hit” 93% di GDP. Esaki nos ta yama un CAFT cu djente falso y cu bosal na boca. Awe sinembargo un Minister di Finansas y Minister Presidente trahando bao di condicionnan hereda casi ingobernabel tin esaki di berdad bao control. Na 2018 no a presta placa extra final di aña manera custumber di AVP pero tabata tin un presupuesto budget neutral. Standard & Poor’s recientemente a upgrade Aruba di negativo (AVP) pa stabiel (Coalicion).

Hulanda kier pone presion riba gobierno
Cifranan di e promer 6 lunanan di 2019, esta e Uitvoeringsrapportage te cu 30 di juni 2019 ta mustra cu gobierno ta completamente “ON TRACK” y lo cumpli cu tur su metanan di acuerdo cu presupuesto. Tur esaki cu un CAFT para ta idle y para ta wak en espera pa Hulanda haya su kier. Awor cu tin un maneho transparente unda tur cos ta cuadra, CAFT y Hulanda ta para ta yora manera poco mucha malcria pa entre otro acomoda Henk Kamp kende te cu awe ta ilegal y contra Ley. Awor Hulanda kier pone presion riba gobierno y Hulanda kier mira un CAFT cu djente. Parlamentario Endy Croes ta bisa cu pa Corsou Hulanda a paga tur nan debenan na 2010 y kisas na Corsou nan por tin otro acuerdo. Hulanda no mester bruha si cu pa Aruba nan no a paga nunca ningun debe y Aruba no a pidi nan nunca tampoco pa paga ningun debe. Pues Aruba lo sali su mes di e desaster cu Hulanda, Mike Eman y AVP a hinca nos aden. Cu Hulanda kier supervisa y controla nos no tin problema pero trata nos cu respet manera “GELIJKE PARTNERS”. Dia cu Hulanda ta sinti cu esaki no ta posibel mas anto Aruba mester busca alternativa cual no lo significa cu mester keda eternamente sufriendo bao di halanan di Hulanda, Croes ta termina bisando.