Home Politics Avenida Nelson Orlando Oduber: Reconocemento na un gran politico y gobernante Arubano...

Avenida Nelson Orlando Oduber: Reconocemento na un gran politico y gobernante Arubano         (parti 1)

SHARE

 

 

Den un serie di 3 articulo partido MEP den e dianan aki lo repasa e trayectoria impresionante di nos lider honorario Nelson Oduber y esaki relaciona cu cambio di “Sasakiweg” den “Avenida Nelson Orlando Oduber” entrante dialuna awor.

 

Nelson Oduber a nace dia 7 februari 1947 na Siribana, Santa Cruz y ta bini di un famia grandi y humilde. Na momento cu Nel tabatin 16 aña famia Urbano y Felepa Oduber-Croes, mama y tata di Nel,  tabata consisti di 15 persona, esta 9 yiu homber y 4 yiu muher. Na e mesun edad ey famia Oduber-Croes a perde e cabes di famia. Na un forma inexplicabel tata di Nel, Urbano Oduber a accidenta y a bini den contacto cu ductonan di alto voltahe electrico. E tata a ricibi kemaduranan horendo y a fayece 4 dia despues. 

 

A sigui periodonan dificil di bida, pero na edad di 18 aña Nel a termina su MULO y a cuminsa yuda su famia financieramente trahando como Schrijver na Eilandsontvanger Aruba. Dos aña despues Nel a dicidi di continua su estudio na Hulanda y a obtene su diploma di Gemeente Administratie, su diploma di Sciencia Constitucional y por ultimo su grado di maestro akte Q, Algemene Onderwijsleer.

 

Na aña 1973 Nel a regresa Aruba y a reanuda su trabao como empleado publico na Departamento di Asuntonan Huridico y General (CBJAZ). Entre 1973 te cu 1975 Nel a traha tambe como docente di Staatsinrichting den e curso di Adjunct Commies. Durante e temporada aki Nel a conoce su esposa Glenda y nan a casa na juli 1974. E union matrimonial aki a ser bendiciona cu 3 yiu homber Glenson, Danquillaume y Nelson Jr. 

 

Nel como deportista

Nel a destaca exitosamente como deportista, caminda  durante 1964-1967 el a bira campeon den atletismo di trayecto cortico den 100m, 200m y 400m y un tercer lugar den salto largo. Tambe na varios ocasion el a forma parti di e seleccion nacional di futbol pa representa Aruba y Antiyas internacionalmente. Na 1966 el a representa Aruba den e prome Weganan di Reino na Surinam den e seccion di atletismo den cual el a logra gana un medaya di plata y un di brons. Entre 1973 y 1975 Nel tabata Secretario di Sportvereniging Sportboys.

 

Prome stap den politica

Nel a termina su estudio na 1973 na Hulanda, a regresa su isla natal y tabata yuda MEP den tur preparacion riba tereno di structura estatal. Mirando su capacidad y su interes den politica Nel a wordo acerca pa promer bes na 1975 pa subi lista di e prestigioso partido MEP. Na e ocasion ey Nel a firma blanco e lista di candidato demostrando su confiansa incondicional den e partido geel. Asina pues dia 25 di april 1975 como candidato no. 23 riba lista di MEP el a dal su promer stap oficial den politica y den su promer salida el a haya sosten considerabel di e pueblo votador. For di 1975 en adelante Nel a aparece fielmente riba lista di MEP y asina a logra ocupa varios funcion importante, tanto como diputado, parlamentario y Minister Presidente di pais Aruba.