Home » Don Flip Carnival Group & Majestic Carnival Group hunto cu Youth Extreme a anuncia “joint venture 2020” pa carnaval 66

Don Flip Carnival Group & Majestic Carnival Group hunto cu Youth Extreme a anuncia “joint venture 2020” pa carnaval 66

by Admin
0 comment 47 views

Durante un conferencia di prensa cu a tuma lugar recientemente na Balashi Gardens e dos gruponan conoci di carnaval cual ta Don Flip Carnival Group y Majestic Carnival Group a dicidi di uni forsa pa sali hunto cu e banda popular di tur momento Youth Extreme.

Manera ta conoci Don Flip Carnival Group ta un grupo di mucha cu pa mas di 10 aña ta tresiendo fantasianan di mucha riba caminda y Majestic ta un grupo cu pa mas cu di 10 aña ta participando den paradanan pa hendenan grandi y sigur ta conoci pa trese gruponan bunita pa dilanti. A presente e oportunidad di uni forsa, colaboracion ta un fenomeno cu ta birando hopi popular y e dos gruponan a uni nan mes na e tendencia aki di combina recursonan, comparti experiencianan y asina por trese gruponan bunita riba caminda y tambe cumpli cu e meta principal cu ta pa engrandece nos fiesta cultural di mas grandi cual ta carnaval.

E dos gruponan aki lo combina esfuersonan pa cu e parada di flambeu y parada di lus den Carnaval 66. E tema lo ta rond di sailors – marineros y pa fakkel esaki lo ta yama “Hey sailors” na unda lo “recruit” tur e marineronan di Aruba pa asina join e “joint venture”. Pa cu e parada di lus e tema lo ta “All onboard” na unda cu e marineronan lo nabega durante parada di lus den cayanan di San Nicolas.

E tema cu Don Flip Carnival Group lo subi caminda pa paradanan di mucha lo ta “Ban hunga weganan di mesa” (board games) manera entre otro Monopolio, “Mens erger je niet”, Candy Land, Ganzenbord y otronan. Tambe lo participa den parada di blaas cu e tema di “Tuti fruit”, tur fruta lo ta riba caminda na San Nicolas. Don Flip Carnival Group lo sigui di ta un di pilarnan y contribudornan pa cu e jump up di Santa Cruz cu aña pa aña ta birando mas grandi y popular. Pa mas informacion por contact via Don Flip Carnival Group su Facebook page.

Pa loke ta trata Majestic e tema official lo ta “The Future is now” na unda cu lo enfoca con Carnaval di Aruba lo ta den futuro, pensando riba colornan, material diferente, mas movemiento y tambe lo duna e oportunidad pa tur bin cu ideanan pa asina ilustra inovacion. Tambe lo ta posibel pa forma un grupo chiquito of seccionan pero pa mas informacion por semper contact via Facebook di Majestic of pasa personalmente na Body Locker.

E banda Youth Extreme tambe a hiba palabra y a expresa nan entusiasmo pa ta forma parti di e “joint venture” y ya caba durante e atardi aki a lansa nan cantica promocional “All aboard”. Youth Extreme ta definitivamente un banda legendario cu a logra hopi hitnan den pasado y ta cla pa hasi mescos den 2020, so expect the unexpected y keda pendiente pa mas temanan promocional cu lo ta na caminda.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio