Home Lifestyle Tips pa un aña escolar  Sea consiente di estimulonan riba sensacion. 

Tips pa un aña escolar  Sea consiente di estimulonan riba sensacion. 

SHARE

E aña escolar nobo a habri y mayornan tambe como maestra y maestronan a prepara pa esaki.  Un di e areanan cu maestra y maestronan ta prepara ta e lokal unda cu nan lo duna nan les. Ta di custumber cu e maestra of maestro ta decora su lokal pa e aña y tambe pa cada temporada di fiesta. Nos di Fundacion Autismo Aruba kier a comparti algun tip cu ta beneficia tur studiante, y specialmente studiantenan cu ta sensitivo pa estimulo di sensacion

  • Ta conciente di e espacio: tuma e tempo pa determina cual ta e miho set up fisico pa un lokal. Pensa ariba puntonan manera bentana, porta, posibel distraccion di pafo etc. Tambe ta importante pa laga un parti di e lokal (idealmente un skina) unda cu studiantenan por tuma breaks si nan ta sinti nan mes un poco fastioso – nunca uza esaki como straf pero como un opcion pa e studiante. 
  • Sistema di Mishimento: ora scol habri, purba semper aserca un studiante di un angulo cu e studiante por wak bo ta bin, esaki ta evita e susto a raiz di e sorpresa. Tambe ta importante pa tene limitenan na cuenta y nunca forsa un studiante mishi, bisti of carga algo cu e no kier. 
  • Holo: evita uza perfumenan mirando cu esaki por ta fuerte pa algun studiante causando no solamente distraccion, pero tambe por causa alergia y dolor di cabes. Si ta opta pa uza essencianan di holo (por ehempel mint, lavanda, eucalypto, etc.) den un lokal, ta importante pa ta hopi sigur cu tur studiante por tolera esaki y cu e tin un efecto positivo pa tur studiante. 
  • Zonido: scolnan por den algun momento bira druk y tin hopi zonido cu por causa distraccion. Ta conciente di kiko e causa di e zonido por ta, si ta algo cu por wordo reduci ta importante pa haci esaki prome embes di purba hisa e stem mas halto cu e zonido. Si tin zonido fuerte cu no por wordo controla, e maestro of maestra por pensa riba otro maneranan pa sigi cu les sin tincu escala e nivel di zonido, p.e. pidi e studiantenan lesa pa nan mes, traha ariba e huiswerk etc. Tambe ta bon pa studiantenan cu ta extra sensitivo pa zonido por tin un caminda cu nan por bai cu ta mas trankilo si mester, por ehempel e 

 

  • bibliotheek di scol. Atrobe, esaki mester ta un decision hunto cu e studiante y nunca un forma di straf. 
  • Visual: manera menciona ariba, hopi maestra y maestro ta disfruta di decora nan lokal. Ta importante pa tene na cuenta cu hopi decorashon di diferente color y patronchi por causa distraccion y stress den algun studiante. Ta importante pa pensa riba decoracion cu ta suave pero tambe cu tin uzo den un lokal. Pensa ariba e lusnan den e lokal cu nan ta agradabel, y pa avisa mantencion mes ora si un bombillo ta sende paga cual tambe por causa distraccion. 
  • Movecion: ta bon pa tin pauzenan cortico durante e dia pa e muchanan por lanta y move un poco. Por pensa riba pauzenan cortico di p.e. 1 minuut, y pauzenan un poco mas largo di p.e. 5 minuut unda cu e muchanan por cana rond. Ta importante pa tin consistencia y un patroonchi pa e pauzenan aki y splica nan na e studiantenan pa nan sa ki ora e pauzenan lo pasa. 

Ta importante pa maestra y maestronan ta conciente di nan mesun patronchinan. Purba mantene un voz calmo y agradabel ora cu ta duna les, tene movecion na un nivel cu e ta agradabel y cu no ta causa distraction. 

Fundacion Autismo Aruba kier brinda un y tur maestro y maestra un aña escolar jena di alegria y momentonan agradabel. FAA ta invita tur maestro y maestra pa tuma contacto cu nos si por tin cualkier pregunta ariba e topico aki y cualkier otro topico relaciona. 

 

Fundacion Autismo Aruba a lanta na 2005 cu e meta pa sostene personanan cu Autismo y nan famia, pa medio di campaña di consientisacion, tayer pa mayor y docente, y actividad particularmente pa muchanan cu Autismo. E fundacion ta totalmente dependiente di donacion y ta constantemente en busca di miembronan pa fungi den directiva y como voluntario. 

 

Pa mas informacion por tuma contacto cu FAA. 

Email: fundacion_autismoaruba@yahoo.com.

Facebook: Fundacion Autismo Aruba.

Cuenta di Banco: rbc #7700000042769067