Miembro di Fraccion di POR, Alan Howell, durante conferencia di prensa di e fraccion a elabora riba deporte na nos isla. El a indica cu Gobierno y tur instancia relaciona mester cuminsa cambia e mentalidad si en berdad kier pa nos deportistanan destaca internacionalmente y trece bon resultado bek pa cas.
E ta bisa enfaticamente cu si nos atletanan no tin e fondonan, e facilidadnan y mentalidad, ta bira dificil pa haya e resultadonan tan desea.
Den mesun rosea el a manda un palabra di pabien pa tur e atletanan Arubiano cu a participa den e Panamericanonan, kendenan a haci nan maximo esfuerso pa representa nos pais y nos bandera dignamente, mas ainda pasobra pa experiencia, e sa cu no ta facil.
Siguiendo cu e tema di deporte, Alan Howell a menciona cu Minister di Deporte ta buscando alternativanan pa bin cu un Lotto nobo mirando e guera di ultimo tempo cu manera Gobierno ta bisa cu e actual lotto tin deporte di Aruba secuestra. Por a scucha cu e lotto nobo cu lo kier bin cune ta pa Salud y Recreacion y Howell ta kere cu ta importante pa busca tur manera pa sali na vanguardia di deporte, pero lo haci peticion na Minister Oduber pa cambia e nomber pasobra si ta papia di un lotto pa salud y recreacion ta hibando awa pa lama pasobra a caba di mira atletanan bin for di Panamericano y loke nan ta haci eynan ta leu di recreacion. “Nos no por ta papia di recreacion. Esaki nos deportistanan riba nivel profesional Nos lo propone na Minister di Deporte pa por yame Lotto pa Salud, Recreacion y Profesional. A papia cu varios deportista y nan no a keda contento cu e nomber mirando e nivel cu nan ta practicando nan deporte y unda cu nos kier hiba deporte tambe na Aruba. Si bin cu e nomber manera cu minister a anuncia, nan ta considera cu esaki lo por ta un falta di respet pa e nivel profesional cu nan ta representando nos isla den deporte”, Alan Howell a duna di conoce.