ORANJESTAD (AAN): Diasabra ultimo, dia 10 di augustus 2019, Kiwanis a realisa e proyecto annual di “Back 2 School” pa di 7 aña consecutivo. Kiwanis tin como meta pa sirbi y contribui na e muchanan den nos comunidad. E aña aki un total di 72 mucha a ricibi ayudo cu nan articulonan pa cuminsa e aña escolar nobo.
Cada mucha a ricibi un tas yena cu articulo di scol manera: pen, potlood, schrift, gum, lineal, etc. E proyecto aki a cubri tanto uniform como tambe jeans, keds, mea y paña interior.
Despues di a haci nan compra hunto cu e miembronan di Kiwanis na Geekay, e muchanan a wordo hiba pa Neptali Henriquez Park caminda nan a disfruta di un dia yena cu actividad y atraccion di e park como entretenemento door di stichting Hungateca. Pa cuminda di merdia e muchanan a ricibi pizza cortesia di Urataka Center. Na Neptali Henriquez Park tambe a ofrece un examinacion di wowo door di Optica Oduber & Kan pa controla si nan bista ta bon. E muchanan a keda hopi contento cu e paña, uniform y nan tas yena cu articulo pa asina cuminsa un aña escolar nobo. E dia tabata uno exitoso mirando e sonrisa riba e cara di e muchanan.
E organisacion di e evento tabata na encargo di un commission di miembronan procedente for di e tres clubnan di servicio di Kiwanis na Aruba, esta Kiwanis Club of Aruba, Kiwanis Club of Palm Beach y Kiwanis Club of Young Professionals Aruba, kende a uni forsa pa asina realisa e proyecto inter-club aki di “Back 2 School”. E gasto di e evento a wordo cubri cu fondo nan cu e club di servicio ta recauda durante anja como tambe pa medio di sponsorships.
Kiwanis kier a tuma e oportunidad aki pa gradici tur esnan cu den un forma of otro a sa di contribui na e evento, y especialmente e siguiente sponsornan: Urataka Center, The Palm Tours, Balashi y R.E. Yrausquin & Sons. Alabes Kiwanis kier a desea nos muchanan un exitoso aña escolar 2019-2020 yena cu hopi energia, bendicion y sabiduria.
Kiwanis ta un organisacion charitativo mundial di voluntario dedica na cambia mundo, cuminsando na un comunidad y un mucha. Nos ta un organisacion den crecimento, dedica na yuda muchanan di mundo henter hisando nan calidad di bida. Pa mas informacion, bishita: www.facebook.com/kiwanisclubofaruba/, www.facebook.com/kiwanispalmbeacharuba, www.facebook.com/KiwanisYPAruba