Awe Aruba despues di hopi tempo bou Gabinete Eman 1 y 2 unda cu a hiba un maneho financiero desastroso y iresponsabel di keda fia y malgasta placa a base di e filosofia Paul Krugman di crea debe y sin percura pa crecemento economico, awe Standard & Poor’s ta confirma e bon rumbo cu Gabinete Evelyn Wever-Croes ta hibando, esta un maneho sostenibel cu cifranan realisticio, cu e curashi di tuma decisionnan dificil y cu ta creando confiansa cerca inversionistanan y instancianan internacional un biaha mas.
Maneho financiero responsabel
Desde entrada di Gabinete Evelyn Wever-Croes y nos minister di Finansas y Economia Xiomara Ruiz Maduro nan a bin ta trahando duro pa crea confiansa bek cerca entidadnan internacional cu alabes lo nifica confiansa den inversionistanan internacional. Den esaki a hiba un maneho financiero responsabel unda cu a percura pa crea presupuestonan realistico y a tuma e curashi pa introduci un reforma fiscal unda cu gobierno anterior a core pa haci esaki. Y awendia tur e pasonan tuma door di gobierno y sigur un parlamento para fuerte pa cumpli cu locual Gobierno a pone como metanan financiero, awe ta ser reconoci cu porfin un biaha mas Aruba ta riba e bon caminda financiero y economico
Confiansa den Reino
E upgrading di nos Credit Rating sigur ta crea hopi confiansa den Reino cu locual nos gobierno a propone na Gobierno di Reino, esta e ruta pa saca Aruba di su debacle financiero laga atras pa Mike Eman, pa stabilisa economia y pa hiba un maneho financiero sostenibel ta cosechando su exito. Y sigur e rol di un parlamento serio cu ta exigi gobierno pa keda den liña di locual a ser aproba, unda cu pa 2018 tabatin un balanced budget pa prome biaha, ta sigui mustra cu e cambio di gobierno y trece un aire nobo tabata e mihor escogencia di pueblo y e exito aki ta danki na e curashi di pueblo pa bay pa un cambio.
Pabien Minister Xiomara Ruiz Maduro
Sigur un pabien na nos Minister di Finansas pa su bon trabao pero tambe su maximo esfuerso pa saca e pais aki dilanti unda nos por crea speransa pa nos futuro generacionnan. Y un biaha mas nos ministernan ta mustra cu cada biahe cu nan haci ta trece bon noticia pa pueblo entre nan a kita Aruba di blacklist, 13 miyon euro pa un facultad nobo na Universidad di Aruba y awo nos ta wak cu danki na e biahenan di trabao aki pa mustra instancianan internacional con e gobierno aki lo atende e retonan financiero y economico di e pais aki, awe nos ta conoce un upgrading di nos Credit Rating di negativo pa stabiel creando confiansa di inversionistanan.Tambe mas instancianan internacional manera IMF ta confirmando e confiansa den Gabinete Evelyn Wever Croes. Y esaki ta duna nos minister mas forsa pa por sigui traha pa Aruba.