Home International Warda Costa a intercepta droga abordo di un barco Venezolano, mas di...

Warda Costa a intercepta droga abordo di un barco Venezolano, mas di 800 kilo a keda confisca

SHARE

Willemstad, Corsou: Diarason siman pasá, 31 di juli 2019, un barco Venezolano cu 10 persona abordo a wòrdo interceptá door di un Metal Shark di Warda Costa den awanan teritorial di Corsou.

Durante di e intercepcion e barco a cuminsa sink, e 10 personanan di diferente nacionalidad a wordo transporta pa e Punto di Sosten di Warda Costa unda a entreganan na Cuerpo Policial di Corsou.

Despues cu ayudo di e cutter Jaguar di Warda Costa, a tow e barco, cu ya tabata mita bou awa, ela wordo mara na pier di e base marina na Parera.

E siguiente mainta, esta dia 1 di Augustus 2019, nan a saca e barco cu ayudo di sambuyadórnan di Defensa y di Cuerpo di bombero di Corsou, nan a pomp saca e awa for di e boto, pa asina personal di Warda Costa huntu cu un team di Zr.Ms. Groningen y Douane cuminsa rista e barco minusiosamente. Durante e ristamento nan a bin topa cu mas di 800 kilo di cocaina scondi den un compartimento den e barco. Mientrastanto e droga a wordo confisca y distruí riba ordo di Ministerio Publico y e 10 personanan cu tabata abordo di e barco aki, awor ta wordo sospecha di a trafica e droga aki.