Mi por a tuma nota cu Mike Eman a papia di educacion y e importancia di esaki, hasta papiando cu palabranan bunita di Sustainable Development Goals number 4 cu ta educacion di calidad. Nos tur ta preocupa y sa cu cos por bay diferente y nos tur sa cu mester bin cambio pa por garantisa calidad di enseñansa pero pa por logra esaki tur hende mester ta riba mesun liña. Tambe nos tur mester ta involucra y hunto nos por logra e cambionan, cu dialogo y combina cu experencia y innovacion nos por logra esaki den tempo corto. Pero esey no ta kita afo cu mi tin di recorda cu hopi situacion y sigur pa locual ta infrastructura y vision pa futuro Mike Eman y su gabinete no a ni interesa pa por tin educacion di calidad na Aruba.
Tram vs Mavo/Havo Noord
Awe nos ta cosecha falta di vision pa enseñansa unda cu mester coba bao baranca pa por crea fondo pa por tin un dependence di Colegio San Nicolas y p’asina por acopla e cantidad grandi di studiantenan cu awo ta bay Colegio. Mike Eman a prefera coy 22 miyon destina pa un scol pa hinca esaki den un tram pa amigonan por a haya trabao y cu te dia di awe e trabao no a keda cla y alabes Caya Betico Croes a keda den coma, mientras nos por tabatin un scol cu no lo a costa pueblo niun placa. Awe nos tin di haci ehercicionan financiero den momentonan dificil pa por cumpli cu e demanda y cu e speransa cu nos lo por traha un Mavo/Havo cu ta necesario.
Scolnan den super mal estado
Den 8 aña infrastructura escolar a empeora. Unda nos por a wak entre otro Juliana School, Reina Beatrix, Imelda Kleuterschool, Sint Aloyisius, Colegio San Hose, Frere Bonifacius y sin conta esnan cu mester un beurt grandi. A priminti airco na tur pero nada no a pasa. Pakico no a haci un PPP proyect pa drecha tur scol, pone airco y inverti den innovacion? Esaki lo a sali mas barata pero sigur den 10 aña nos lo a cosecha su frutonan unda nos lo baha gasto den husticia, social y sigur lo a gana cu mas hende trahando riba e pais aki, pero un biaha mas a opta pa duna PPP cu lo duna amigonan y famianan manera pa bira rico riba custia di e pober cu tin di paga e debe crea. Mientras no a duna e yiu di e pober e oportunidad pa por desaroya pero pa e keda dependiente di gobernantenan sin escrupulo.
Speransa
Pronto nos lo trata un ley unda lo crea un Aruba Property Fund y den cuadro di esaki por crea e posibilidad cu nos por haya e espacio financiero cu nos por cuminsa riba e scolnan ariba menciona pa por duna nan un edificio nobo y moderno pa por duna contenido na PEN 2030. Gobierno y parlamento ta haciendo lo maximo pa purba yuda den enseñansa.
Edgard Vrolijk ta trahando for di parlamento sin hinca pueblo den debe. Mientras Mike Eman ta keda trece discordia, mi persona como parlamentario a logra den un aña y 7 luna pa mi proyecto Adopta un scol, percura pa dos scol haya airco y pronto un di tres ta na caminda. Danki na Gobierno, sector comercial y tambe sector hotelero cu ta wak e importancia di educacion y sigur di innovacion pa locual ta futuro di educacion y pa locual ta trabaonan den futuro. Mientras Mike Eman y su parlamentarionan cu no tin ni e decencia di presenta na reunionan publico cu pueblo ta paga nan salario, mi persona ta trahando duro pa educacion y bienestar di nos muchanan na proyectonan cu no ta costa caha di gobierno pero cu tin beneficio pa pueblo y nos futuro.