Durante reunion teni dia 1 di augustus 2019 Ministerio di Desaroyo Teritorial y Infrastructura y Medio Ambiente a sinta cu organisacion ATIA, AHATA, ATSA, KVK y SNBA pa asina enfatisa e importancia di un maneho nacional pa locual ta desperdicio di Aruba. Durante e reunion cu a tuma luga riba invitacion di Ministerio, un team di experto completo presente cu un scala di documentacion un bes mas den forma transparente a duna bista di e trabounan cu pais Aruba ta haciendo conhuntamente cu organisacionnan manera WEB y TNO pa atende den forma integral na e problema di desperdicio. Durante e reunion a tuma tempo tambe pa asina por a para keto na pregunta, preocupacionnan y ideanan cu organisacionan presente tabata tin.
Pa locual ta e solucion nacional, por indica cu esaki a tuma luga a base di conseho ricibi y documenta di e grupo di experto di cual organisacionnan manera ATIA a forma parti di dje. Pa medio di e rapport ‘Integrated Solid Waste Management Aruba’ tur esnan cu a forma parti di grupo di experto a conseha pais Aruba pa encamina un proceso di corto-medio y largo plaso pa locual ta maneho di desperdicio. Parti di e solucion a largo plaso ta construccion di un’Waste to Energy Facility’ cu ta state of the art y no comparabel cu locual hopi ta conoci cu ne.
Durante e reunion Ministerio a atende esnan presente riba algun conclusion eroneo haci a base di rapport publica di Arcadis . Arcadis a haci un evaluacion di algun tecnica di maneho di desperdicio financia door di compania EcoGas. Ministerio a indica cu ta lamenta cu gremionan a tuma e informacion aki sin mas y sin haci nan due diligence manera ta custuma di organisacionnan profesional manera esnan presente. Asina ta indica cu ora ta trata di produccion di cement esaki tambe lo significa kimamento di sushi y den e caso aki na Colombia y no na Aruba. Por a tuma nota cu algun organisacion no tabata na altura cu den caso exportacion manera proponi den e raport esaki lo significa cu lo kima sushi na Colombia.
Algo cu ta bai encontra di conseho cu organisacionan manera ATIA mes a duna unda cu den raport ‘Integrated Solid Waste Management’ paragraaf 1.2.5 e grupo di experto mes ta indica cu ‘The problem may not be relocated’. Akinan enfocando riba e aspecto cu ta di gran importancia unda Aruba como nacion responsabel no por ‘dump’ den forma irresponsabel su problemanan na otro pais. Akinan ta unda cu etica den sector publico y priva mester prevalece.
Tambe Ministerio por a demonstra na esnan presente cu a akinan ta trata di un proceso integral, solidio y transparente cu tin un trayectoria ya casi di 1,5 aña. No ta di un dia pa otro a bin cu un plan nacional sino ta trabou incasabel di un grupo grandi di departamento y experto cu a conduci na asercamento adopta.
Pa locual ta precupacion expresa relaciona cu cambio di ley, Ministerio a informa cu esaki ta uno eroneo ya cu desde inicio di Serlimar tur compania pa ley mester deposita nan sushi na Parkietenbos y awo na sitio cu ta forma parti di solucion medio plaso. E ley cu lo wordo introduci no ta cambia nada na esaki. Si ta asina cu tin algun compania cu pa añas caba ta ‘dump’ ilegal causando daño grandi nan nos medio ambiente como tambe salud di nos comunidad. Asina por pensa riba e candela cu a tuma luga aña pasa na dump di Moko of awa di pos cu a wordo deposita den nos damnan perhudicando nos cunukeronan. Pais Aruba su responsabilidad ta pa percura pa por tin un bon clima pa por haci comercio. Sinembargo, con lo por haci comercio si nos ciudadanonan nan salud deteriora pa falta di un plan nacional y cumplimento cu ley?
Relaciona cu preguntan haci di e destaho publico akinan Ministerio a informa no ta trata di un extension di un destaho publico sino terminacion di esaki y inicio di un asina yama ‘limited tendering’ conforme ley y tratadonan internacional. Ministerio a splica esnan presente cu e motibo prinicipal cu a sigui cu e un ‘limited tendering’ ta paso varios interesado a indica cu e tempo pa por a entrega nan proposicion tabata cortico.
Relaciona cu costonan menciona. Ministerio a duna organisacionan presente un splicacion amplio di e proceso di cu a tuma luga pa cu un solucion medio plaso y a demonstra a base di relato di accountant independiente cu e tipping fee di parti di Pais Aruba a keda 60 florin pa ton manera e semper tabata ta y cu e compania encuestion ta cobra 120 florin pa ton pa ‘bale’ sushi. Es decir cu Pais Aruba no a subi prijs sinembargo e compania encuestion si a haci esaki.
Na final por menciona cu Ministerio tabata sumamente satisfecho cu e reunion y ta gradici tur organisacion presente pa nan perspectiva y ideanan. Tambe ministerio tin tur confiansa cu tur esnan presente ta para tras di un solucion nacional cu ta subraya interes di un grupo sino ta representa mehoracion di calidad di bida di cada un ciudadano. Un plan nacional ta un plan pa nos tur. Ministerio tin tur confiansa cu banda di ta vigila trabou di pais Aruba (algo cu ta wordo mira como positivo) gremionan lo sa di tene nan mes informa, haci nan due diligence, duna informacion corecto, participa y ta parti di e solucion.