Oranjestad – Manera semper durante lunanan di april te cu augustus, Aruba Tourism Authority ta prepara su plan y presupuesto pa e aña binidero. Como parti di e proceso aki ta revisa e strategia y e proyeccionnan pa no solamente e aña cu ta sigui, pero tambe pa e añanan posterior na esey. Pa medio di diferente reunionnan cu ta tuma luga local pero tambe internacional, ta revisa aspectonan di importancia.
Parti di e reunionnan tawata cu socionan den e sector priva, pa enfoca riba mercado di Norte America, Europa y e siman cu a pasa a reuni cu e socionan pa discuti strategia, proyeccion y plannan pa 2020 pa e continente di Latino America.
Pa loke ta trata e reunion di Latino America (cu a tuma luga prome di augustus), a enfoca riba diferente punto cu lo continua den 2020, pero tambe – manera semper – algun cambio grandi cu A.T.A. lo efectua den e aña binidero. Aki a tuma e oportunidad tambe pa tuma cierto decisionnan hunto cu esnan presente, basando cambionan riba input di socionan clave. Entre otro a papia riba ANATO 2020 y CATA 2020.
Den e contexto aki ta gradici AHATA tambe kende, manera a bira custumber, ta compila feedback y ta entrega na A.T.A. e pensamentonan pa cu cada region, ya asina A.T.A. por tuma esaki na cuenta tambe durante e proceso, locual a sosode.
Den 2018 e continente Suramericano a representa 18.9% di e cantidad total di bishitantenan pa Aruba. E mercado Venezolano a / ta sigui confronta retonan grandi. Aña pasa nos isla a ricibi un total di 164.085 turista Latinoamericano. Por a nota cu -si exclui Venezuela- e continente Latino America a cera cu un crecemento di turistanan ‘stay over’ pa Aruba di 7%, un total di 113.503 bishitante. Strategia lo sigui enfoca riba e ultimo mercadonan aki, esta Argentina, Brazil, Chile y Colombia primordialmente, pa asina sigura cu e region (fuera di Venezuela) sigui den crecemento. Esaki ta un parti cardinal di e strategia di Aruba pa diversifica su mercadonan. Tambe lo sigui traha riba Peru, un mercado cu a bin ta mustra crecemento y un pais cu ta importante, mirando esfuers onan continuo pa logra un buelo non-stop for di Lima, haciendo di esaki e ora e di tres hub clave den Sur America pa Aruba, banda di Bogota y Panama. Mas cu claro tin diferente otro esfuerso riba area di aviacion cu ta ricibi atencion di A.T.A. hunto cu Aruba Airport Authority.
Conforme planificacion, A.T.A. ta entregando su Plan y Presupuesto pa 2020 na Hunta di Supervision di A.T.A. dia 30 di augustus. Esaki ta wordo revisa debidamente door di e miembronan. Consecuentemente e Plan y Presupuesto 2020 lo wordo entrega na Minister di Turismo den september 2019. Diferente reunionnan lo sigui pa asina completa otro ciclo di produccion di plan y presupuesto.