“Si mi sa unda mi yiu ta mi mes lo a bay buske”
Diaranson den oranan di atardi, Niurca Kock, mama di Miguel Schneiders a papia un rato cu nos di Arubanative.com despues di a recobra su libertad y ta na cas bek cerca su famia stima.
Tabata sigur dos pa tres dia traumatico pa un dama cu inocentemente a keda deteni.
Ela conta nos cu Dialuna pa mas o menos 11’or y 55 di mainta, ela wordo yama pa presenta na Warda di polis na Santa Cruz pa interogacion. Pues niun momento a wordo aresta ni na su cas y mucho menos na trabou.
Prome cu ela wordo interoga y a keda deteni, riba varios media y facebook e noticia tabata den publicidad cu su potret y te hasta cu potret di su cas, cu autoridad a detene. Esaki sigur ta algo hopi inhusto cu a wordo cometi cu su persona.
Dialuna pa 2’or y 45, mientras Niurca tabata wardando pa wordo interoga, su abogado a presenta na warda y mesora a puntra “ken ta esun cu a saca e informacion cu su cliente ta deteni, paso su cliente no a ni wordo interoga ainda.
Vocero di polis algo prome cu 3’or di atardi a manda un mensahe via Whatsapp pa prensa den cual ta bisa cu a detene dos persona cu a yuda libera fugitivo Schneiders, den e mensahe aki no tabata menciona niun caminda cu e dos personanan aki ta sospechoso, siendo un persona ta sospechoso prome cu e wordo haya culpabel.
Dialuna pa mas o menos 3’or di atardi, e recherchenan a cuminsa cu e interogacion y te 7’or y 45 di anochi, ela wordo deteni y transporta for di Warda di Santa Cruz pa Warda di Noord.
Ela contanos cu e boei cu nan a bistie tabata haci’e hopi dolor y cera na Warda di Noord, niun dia a lag’e lucht. E trahadornan di CEA si tabata amabel, djis e calor tabata insoportabel. Diamars nan a bin buske pa hibe Warda di Polis na Santa Cruz, pero pa un motibo of otro nan no a interog’e mas, nan tabata djes kier a confirma loke ela bisanan ta cuadra cu e berdad, cu dia cu su yiu a huy, e tabata trahando y sigur no por tabata complice niun momento di e huymento di Miguel.
Niurca a sigui bisa ta trata di un caso den cual su yiu ta fugitivo y ela wordo deteni paso segun recherhe ela yuda su yiu huy, ela sigui bisa cu esey sigur no ta klop, niun momento e no a yuda su yiu y tin mas cu dos siman cu e no sa nada di su yiu.
Diadomingo 14 di juli, na momento cu Miguel a huy, Niurca tabata trahando, su yiu tabata cera na warda di polis na Santa Cruz caminda e mama no tabata tin mag di bishite, ni yega cerca di dje.
Niurca a sigui bisa, cu te awe autoridad no a yega na su porta pa bise algo di su yiu. E como mama no sa nada y tin yen di pregunta. E no sa con su yiu a huy, e no sa kiko su yiu ta haciendo, e ni sa si e ta bibo of si algo por a pase. E no sa ni unda pa cuminsa busca su yiu. Niurca a sigui bisa cu si e tabata sa unda su yiu ta sigur e mes lo a bay buske, paso e kier pa su yiu ta bon.
Ya tin dos siman y mey cu su yiu a huy y como mama bo ta keda preocupa pa bo yiu, paso segun e ta bisanos, e no sa nada nada di su yiu. solamente preguntanan sin contesta ta keda atras. Ela huy, e ta na bida? e ta bon di salud? Unda e ta, e ta bon? preguntanan cu Niurca ta haci y no ta haya contesta.
Kiko ta bay pasa awo, con elo por haya sa algo di su yiu?
Den e mesun rosea e ta bisa, cu awo ta yama su yiu asesino pero e ta pidi autoridad pa bay puntra na Molen kiko exactamente a pasa, puntra rond pa haya sa e berdad, como mama e ta pidi esaki.
E tabata dos dia hopi traumatico y den un infierno pio ora bo ta wordo cera inocentemente, e ta hopi contento di ta na su cas bek y ta rondona pa e amor di su famia.
Ni kiko un yiu haci, e amor grandi di un mama ta surpasa tur cos.