Ya caba gabinete Wever Croes no sa mas con pa hustifica publicacionnan den medionan local, di e sumanan exhorbitante cu nan ta gastando na biahamento rond mundo.
Parlamentario Arthur Dowers ta mustra cu simplemente ministernan di e gabinete actual, no kier compronde cu simplemente nan no por ranca placa for di cartera di pueblo, pa nan mira mundo cu excusanan barata y sin sentido.
“Na momento cu scucha reaccion di e ministernan riba e costo halto di biahamento di e gobierno den menos di dos aña di tempo, por realisa cu simplemente gabinete Wever Croes no ta traha pa pueblo pero solamente pa nan mes, pa nan famia, pa nan sponsornan y nan amigonan.
Un di e reaccionnan publica riba social media, por tuma nota cu segun Minister di Finansa Xiomara Ruiz Maduro, su biahenan tabata pa ‘recupera credibilidad financiero’ di pais Aruba mientras cu na cas mes, e situacion a deteriora bou responsabilidad di su gobierno, cu hasta Hulanda ta bin pone orde dentro di poco.
Costo di biahenan di e minister aki, ta alrededor di 891 mil florin, pues na drempel di un miyon florin y no ta wega e cos aki y riba e lista publica den medionan di comunicacion recientemente, ainda falta un biahe pa Bora Bora caminda nos ta sigur cu no tin ningun centro financiero pa drecha credibilidad di su gobierno.
Ta mesun Minister aki hunto cu Prome Minister Evelyn Wever Croes, a insisti ora cu nan a tuma gobernacion over, cu nan lo drecha e situacion financiero sin tuma medida pero ni algun siman despues, pueblo a wordo suta cu medida sin piedad.
Entre otro Evelyn a mustra cu e lo reduci gastonan di biahamento pero te ainda nada di esaki por wordo nota den e round trip di su ministernan rond mundo.
Nos ta puntra nos mes con Xiomara Ruiz Maduro ta biahando rond mundo pa recupera credibilidad financiero di Aruba, anto tanto CFT como gobierno Hulandes ta cuestionando su maneho, cuestionando e hecho cu su gobierno no ta cumpliendo cu loke nan mes a priminti Hulanda di haci.
Gastando asina hopi placa pa recupera credibilidad financiero anto Hulanda tin un KB pa impone riba e maneho di Minister Ruiz Maduro, ta bisa hopi di e biahenan di e mandatario aki, ya cu el a biaha gastando placa di pueblo sin percura pa recuperacionnan financiero cu ta na interes di pueblo.
Lo ta bon pa Minister Ruiz Maduro bin dilanti y splica pueblo, ta riba cual di e biahenan aki el a wordo avisa pa bolbe bin cu mas medida contra pueblo, pa bolbe bay den cartera di pueblo y ranca mas placa, pa aumenta impuesto sin piedad, pa su gobierno sigui haci e pueblo aki mas pober, pero basta tur e ministernan sigui conoce mundo mientras pueblo ta sufriendo.
No ta na su luga pa Minister bin trata di hustifica cu biahenan pero lo ta mas na su luga pa Minister bin bisa pueblo cu e tin mas pakete di medida na caminda, cu e vision di su gobierno ta pa sigui percura pa inflacion sigui crece y percura pa famianan rond Aruba, sigui confronta mas problema financiero.
Tur esaki mientras cu su ‘trip around the world’ ta sigui hunto cu su coleganan caminda ta parce cu tin un competencia entre e ministernan di Gabinete Wever Croes, kende por biaha mas tanto den corto tempo,” Parlamentario Arthur Dowers a mustra.