Oranjestad –Recientemente Minister Xiomara a atende un presentacion interesante di Oficina di Estadistica (CBS) en conexion cu e preparacion di e Programa Piloto di Censo 2020 ‘Pasobra Aruba ta conta cu bo’.
E Programa Piloto lo cuminsa diahuebs dia 3 di october y lo termina diadomingo dia 13 di october. Pa ehecuta esaki, CBS ta recluta y train personanan confiabel y capacita pa por haci e tarea aki. Den e Programa Piloto aki e encuestadornan lo bishita algun hogar selecciona pa CBS pa completa a formulario di Censo 2020. E meta di e Programa Piloto aki ta pa test e procedura di e informacion cu lo wordo colecta, ya cu e Censo 2020 lo ta completamente digital.
Gobierno di Pais Aruba tin den su programa gubernamental e programa di Metanan di Desaroyo Sostenibel di Nacionnan Uni (SDG’s). Censo 2020 ta un instrumento masha importante durante cual por ricibi informacionnan valioso pa asina por midi na e lista di e metanan cu Nacionnan Uni a establece. Ademas varios instancia y hende individual por haci uso di e informacion colecta den Censo 2020.
Minister Ruiz-Maduro ta desea e expertonan di CBS hopi exito cu e preparacion di e
Programa Piloto y ta yama danki na tur e boluntarionan cu lo coopera pa haci e encuesta nacional aki. Alabes e mandatario ta haci un yamada na nos pueblo pa coopera cu e encuestadornan pa asina e programa piloto di Censo 2020 por ta exitoso.
