Algun siman pasa Hunta di Directiva di Hospital y LabHOH a ricibi algun señal bastante contundente cu ta duna indicacion cu tin iregularidad pasando den LabHOH. E señalnan aki sin duda Hunta di Directiva a tuma hopi na serio y di biaha a cuminsa cu un asina yama “vooronderzoek” interno sigui adicionalmente pa un “feitenonderzoek” haci pa un compania externo.
Basa riba algun punto cu a sali for di e “feitenonderzoek” a duna como conseho na Hunta di Directiva pa bay over riba un investigacion forensico. E conseho aki ta basa riba indicacion di un presunto violacion di integridad. Loke ta investigando ta e proceso completo di testnan cu ta ser efectua pa departamento di patologia di LabHOH y specificamente testnan haci pa un compania Hulandes. Hunta di Directiva a haya suficiente indicacion cu a conduci na pidi un compania externo pa inicia un investigacion forensico.
Hunta di Directiva su deseo ta pa e investigacion aki cana e caminda corecto y kier sigura cu a tuma tur paso legal necesario te ora e resultadonan di e investigacion ta conoci. Ta importante pa menciona cu Hospital y LabHOH ta distancia su mes di expresionnan haci den medionan di comunicacion. Motibo tras di esaki ta cu tanten un investigacion ta andando y resultadonan no ta conoci ta iresponsabel y no profesional. Ta importante pa duna espacio pa asina e proceso di investigacion cana su caminda.
Si en berdad e investigacion duna di conoce cu ta trata aki di iregularidad nos kier sigura cu lo tuma pasonan adecua.
Calidad y integridad ta sumamente importante pa Hunta di Directiva di Hospital. Tur e profesionalnan di LabHOH kier sigura pashent cu nan por ta trankil ora nan pasa cerca nos pa cualkier test diagnostico. Apesar di e circunstancianan dificil actual ta haci tur lo posibel pa garantisa e mesun servicio di calidad na cualkier di nos localidadnan.