Booshi Wever: OTMAR ODUBER, UN MENTIROSO PATALOGICO Y MANIPULADOR PELIGROSO CU MESTER DI TRATAMENTO URGENTE, SINO TA NOS PAIS Y NOS PUEBLO LO SUFRI.

Pa basta tempo UPP a bin ta observa e modus operandi di Otmar Oduber, kende na tur sorto di forma a bin ta trata na hustifica su actonan di gobernacion cu retoricanan bunita, contradiccionnan den splicacion, y ora e sinti cu e no por gana hende cu su splicacionnan y argumentacionnan persuasivo, ta recuri na gañamento y na insulto-, acusacion- y insinuacionnan,  a la “MENTE POLLO” pa e mustra di ta “the best and righteous guy ever”. Of crioyiamente bisa, “mas santo cu e Papa di Roma”.

Henter su modus operandi aki, pues den cierto sentido di purba na persuadi of manipula pueblo pa di e manera ey desvia e atencion di kico realmente ta sosode, ta pa asina ey pone hende kere cu e berdad ta unicamente na su banda y di acuerdo cu su mundo, sin worry cu e no ta cumpli cu ningun sorto di transparencia. Mientrastanto e berdad mes ta “ver” “zoek”. Esaki nos ta bay ilustre cu algun ehempel cu ta recien.

1. Den un entrevista riba 12 di juli ultimo cu Mas Noticia, Otmar a indica cu ta Booshi Wever a bay LAR, despues cu partido UPP no a haya copia di documento. Tambe den un programa di Johnhy Habibe merdia, Otmar ta bolbe ripiti esaki na un oyente, cu ta Booshi Wever a bay LAR contra su persona como minister. Siendo ta Otmar mes ta esun cu a manda e carta pa e e comision di LAR. Loke nos a urgi na dje ta pa e duna nos copia di e documentonan cu UPP a haya pa mira. El a “wijs” peticion aki “af”, y  ta Otmar “himself” a manda esaki pa LAR.

2. Un otro parti cu Otmar no ta papia berdad, ta ora cu eta indica cu ta tur e stakeholdernan cu a participa na e encuentro di comienzo di aña den e proceso di RFP ta esunnan cu a indica cu e mihor opcion ta e WTE-concept. Esaki ta pa contradeci esnan cu no ta na fabor di un tipo di procesamento asina y cu ta tur e 27 companianan a yuda gobierno yega na e decision aki. 

Pero realidad ta cu e escoho tabata cla caba momento na comienzo di 2018, ora cu gobierno a cuminsa cu e proceso aki. Den e prome frase di e “request” caba a indica, cu ta e intencion di gobierno pa solicita “proposals from the waste-to-energy industry” pa bin cu un facilidad asina pa Aruba.

Es mas, ya caba na oktober 2017, na momento cu a bin cu e programa di gobernacion, “Hunto pa Aruba!” riba pagina 20 ta para cu lo “Instala un incinador (“incinerator”) pa kima desperdicio (ya selecta) y usa e energia aki pa genera (un parti di nos) elecricidad y produci awa.” 

Mientras cu den programa di MEP tabata papia di haci un investigacion di situacion di Dump na Parkietenbos y wak si por pone e planta bek den funccion, y RED su programa ta papia di un maneho di sushi den cuadro di e “economia circular” of economia blauw, partido POR ya caba hopi prome cu eleccion tabata tin como punto den su programa: “dentro di 100 dia cu asumi responsabilidad gubernamental lo bin cu un solucion definitivo pa e dump na Parkietenbos, dunando preferencia na companianan local y tecnologia moderno y probá di reciclahe y di converti sushi den energia (“waste to energy”). Kier men “way back” caba tabata tin esaki predefini, y parce ta pesey e tin e cartera aki y cu ta su escoho tin e preferencia.

3. Un otro engaño di Otmar ta cu e ta bisa cu e proposalnan lo ta den direccion di BOO (Build Own & Operate). Pero den e RFI di comienzo di 2018 cu a bay pa companianan, ta papia cu gobierno ta buscando participacion di sector privá pa mehora e maneho di desperdicio aki na Aruba, anto “through the design, construction, financing, operation and maintenance of a Solid Waste Treatment Facility (SWTF) on a Design-Build-Own-Operate-Transfer (“DBOOT”) basis. Pues defacto un sorto di PPP. Anto gobierno mas leu ta bisa: “ SWTF will be the mass-burn incineration of solid waste in order to produce electrical energy”. Y tambe ta bisa cu e desaroyador lo opera y mantene  e planta aki pa un periodo di 20 aña y e “request” ta bisa “At the end of this period, the developer will transfer the assets to the Government of Aruba under certain conditions”. Inclusivo den un BOO, lo tin casi sigur condicionnan cu ta mara gobierno of e pueblo di Aruba.

4. Un otro mentira cu Otmar ta uza ta cu e no sa for di unda a sali cu e WTE plant lo costa rond di 300 miyon. E suma aki na varios ocasion a wordo uza y den e Economic Policy di 2019-2022, saca na mei ultimo riba pagina 48 ta papia di 300 miyon dollar.  Esaki como parti di “proposed activity 2018-2019”.

5. Como no sifuera poco, Otmar ta bin bisa cu di acuerdo cu tratadonan internacional den e caso aki Ecogas lo no por exporta sushi. Pues cu lo tin convenionan existente. Esaki mas bien ta conta pa desperdicio quimico y no sushi di cas, yama Municipal Wast, cu wordo procesa den RDF.

Asina aki UPP kier mustra cu Otmar keto bay ta den un wega di manipulacion, na unda cu e ta trata na desvia tur atencion contal e yega na su kier. Tur esaki ta cuadra cu e forma cu un persona riba facebook a trata na defini “Otmarismo”, esta e accion di: “manipula hende cu algo cu no ta existi den realidad, pa cambia of laga afo cierto hecho- of partinan di un storia of situacion, minando asina necesidad/grito pa transparencia y integridad.” 

Cu otro palabra, Otmar bay gaña baca!!!

Aruba,  30 juli 2019

Booshi Wever

Lider UPP

Brazil 163