Oranjestad – Recientemente, Aruba Convention Bureau den colaboracion cu Santa Rosa y ECO DMS, a asisti e corporacion Marklogic cu un bunita donacion pa Imelda Hof. E donacion aki ta consisti di un plantacion di 3 mata di fruta y alabes a instala un banki pa sinta den cura.
Kico ta Marklogic Corporation?
Marklogic Corporation a wordo funda na aña 2001 door di Christopher Lindblad. Esaki ta un empresa Mericano di software cu ta para pa desaroya y proporciona un base di dato. E compania su oficina principal ta situa na San Carlos, California y nan tin oficina na Europa, Asia y Australia. Na aña 2016 ‘Forrester Research’ a nombra Marklogic un di e nuebe proveedornan cu ta lidera den e mercado di ‘database’ y e compania ta wordo mira como un ‘Visionary’ den e mercado di ‘database’.
Logro
E aña aki Marklogic Corporation a bin Aruba specialmente pa celebra nan ‘President’s Club’, cu ta pa reconoce nan miho empleadonan. Ademas di haci e donacion pa Imelda Hof, e compania tin como meta pa duna bek den comunidad rond mundo. Pues, mirando cu nan ceremonia a tuma luga na Aruba, tur e participantenan di Marklogic Corporation a colecta articulonan di scol y a entrega esaki na Jurica Tjon di The Helping Hand Foundation, un organisacion local cu ta para pa muchanan di menos recurso.
Ademas, durante nan estadia, e participantenan a disfruta di diferente actividadnan como tambe e gastronomia cu nos isla ta ofrece.
Di parti Aruba Convention Bureau, esaki ta un honor pa celebra nan logro na nos pais y alabes dunando bek na nos comunidad. Gradicimento ta bay na Nathalie Maduro y Jennifer Gamez di Santa Rosa, Natalia Hernandez di Imelda Hof, Jose Henriquez di ECO DMS, y Jurica Tjon di The Helping Hand Foundation.
Finalmente, nos ta gradici Andie Putnam di Marklogic Corporation pa scoge Aruba como destinacion pa celebra nan logro.
