Un reunion caminda a trata diferente topico cu Tromp-Lee ta trahando riba nan y alabes a trata otro topiconan cu ta regarda e area laboral
Awe, 24 di juli 2019, Parlamentario Shailiny Tromp-Lee a tene un reunion cu Mediador di Gobierno sr. Anselmo Pontilius. Un reunion caminda a trata e topiconan: Ley di Salario Minimo y posibel introduccion di un salario minimo pa hoben (Minimumjeugdloon).
Pa loke ta trata e Ley di salario minimo Tromp-Lee tin algun cambio cu e lo kier presenta mediante un iniciativa di ley y ya pa algun tempo ta encaminando un ronda di consulta pa plantia esakinan na diferente stakeholders y alabes ta usa e ronda aki pa inventarisa deseo pa cambio cu diferente stakeholders mes ta presenta. Asina por haci un solo trabou.
Pa loke ta trata salario minino, Tromp-Lee, entre otro ta plantiando e proposicion pa bin cu un salario minimo pa ora (minimum uurloon) pa haci e salario minimo uno mas husto. Actualmente na Aruba ta existi un salario minimo di Awg. 1762,48 pa luna, no obstante e cantidad di ora cu bo ta traha. Segun Tromp-Lee esaki ta trece un situacion inhusto cu ne. Esnan cu ta traha mas ora pa siman ta gana menos pa ora. Aki bou esaki por keda ilustra.
Aruba
| Cantidad di ora pa siman | 40 ora | 42 ora | 44 ora | 45 ora | 48 ora |
| Salario minimo pa ora Awg. | 10,28 | 9,79 | 9,34 | 9,13 | 8,56 |
| Salario minimo pa siman Awg. | 411,07 | 411,07 | 411,07 | 411,07 | 411,07 |
| Salario minimo pa luna Awg. | 1762,48 | 1762,48 | 1762,48 | 1762,48 | 1762,48 |
Tromp-Lee a haci caba e trabou di comparacion cu e situacion na Curaçao y Hulanda pa haya un bista con esaki ta regla eynan. Tromp-Lee ta indica cu ora pone por ehempel e tabel di Curaçao banda di esun di Aruba mesora e diferencia ta keda resalta.
Curaçao
| Cantidad di ora pa siman | 40 ora | 42 ora | 44 ora | 45 ora | 48 ora |
| Salario minimo pa ora NAf | 9,37 | 9,37 | 9,37 | 9,37 | 9,37 |
| Salario minimo pa siman NAf | 374,80 | 393,54 | 412,28 | 421,65 | 449,76 |
| Salario minimo pa luna NAf | 1622,88 | 1704,02 | 1785.17 | 1825,74 | 1947,46 |
Durante e reunion a trata otro aspectonan cu Tromp-Lee ta trahando ariba dje por ehempel e metodo di calculacion cu ta keda trata den articulo 13 di e Ley di Salario Minimo y e proceso den su totalidad cu Minister di Labor mester encamina pa ahusta e salario minimo.
Tromp-Lee ta comparti cu durante cu a trata e posibel introduccion di un salario minimo pa hoben a keda trata tambe e diferente topico/retonan cu ta existi pa loke ta trata e grupo meta aki, esta hobennan di 15 pa 17 aña manera leerplicht, scarcedad di posibilidad pa stage y falta di regla/ley cu ta regla esaki, dropouts, situacion social, balor di nan diploma pa mercado laboral y chance pa haya trabou, etc.
Tromp-Lee ta menciona cu manera tabata di spera den corto diferente otro topiconan a keda trata manera matching di enseñansa y mercado laboral, proyecto hotelero den tapara, orario di trabou den sector hotelero, disappearing Jobs door di e.o. automatisacion, vergrijzing y om- en bijscholing necesario.
Tromp-Lee ta indica cu e reunion tabata uno bon y hopi interesante y cu el a habri caminda pa keda den contacto cu Oficina di Mediador pa trata otro topiconan cu nan oficina a señala den nan ultimo Jaarverslag.