Parlamentario Endy Croes ta hopi indigna pa mira con ainda puitonan ta keda sali for di macuto di e desaster den Lotto y ainda e mesun Bestuur di activistanan di AVP nombra pa Mike Eman y Mike De Meza ta esnan cu ta masacrando un Fundacion cu a wordo lanta desde 1982 pa MEP cu intencion cu e placa cu Lotto genera lo bay bek directamente den Deporte y p’asina alivia gobierno e tempo aya y duna deporte e oportunidad pa haya mas placa pa por desaroya nos atletanan.
Persecucion di AVP den Lotto
Na 1982 Betico Croes (dfm), Roy van Putten (dfm) y Remie Zaandam tabata esnan cu a bin cu e idea aki y a ehecut’e. Lotto a keda crece y na aña 2000 a innova y a bay online y a sigui mira crecemento enorme. Desde cu MEP a drenta gobierno na 2001 a ricibi un Lotto cu un benta bruto di 14 miyon pa aña y den transcurso di 8 aña di trabounan duro tras di e vision di Ramon Lee, Dochi Lee y e Bestuur di e tempo aya a logra triplifica e benta bruto entregando esaki na AVP na 2009 cu un benta bruto di 42 MIYON anual. Na november 2009 AVP a drenta gobierno cu sed di vengansa unda Mike Eman y Mike de Meza a nombra activistanan di AVP den bestuur cu un solo proposito pa persigui tur hende cu no ta simpatisa cu e color berde. A kita un total di 12 empleado per direct unda algun a bringa AVP/Lotto cu alma y cuerpo, unda e aña aki 17 di mei 2019 despues cu 3 hues den hoger beroep tambe a kibra (vernietig) e rapport di Ernst & Young y un otro 5 Hues den Cassatie na Hulanda a duna un veredicto cu Ernst & Young a comete un onrechtmatige daad contra Croes door di traha un rapport falso cu cantidad di mentira contra Croes y Huesnan a kibra esaki. Banda di e berguensa grandi aki pa Ernst & Young bo mester puntra bo mes cual ta e laso di Bermudez (ex minister di AVP) y su persona como partner di Ernst & Young? Pues 1+1 no por ta 3. Croes actualmente a inicia un caso pa e daño cu el a sufri.
Derecho riba Credit Card?
Mientras tanto Parlamentario Endy Croes ta sigui bisa cu poco poco e ta keda ricibi mas documento. Croes ta lamenta cu Lotto a malgasta mas di 3 MIYON den e caso pa persigui su persona unda por a drecha hopi stadion y deportistanan por a disfruta mucho mas di e placa aki. Awe nos ta trece un otro berdad dilanti. Desde 1982 cu Lotto a lanta nunca pero nunca un Bestuur a hinca den nan cabez cu nan tambe tin derecho riba un Credit Card. Solamente e Directeur tabata tin un Credit Card y esaki ta mas cu logico. Croes ta splica cu e mes a forma parti di Bestuur di Lotto desde 2001 pa 2009 y como Presidente di Bestuur nunca e tabata tin un Credit Card. Na april 2009 cu el a bira Directeur el a ricibi derecho pa tin un Credit Card di Lotto y esaki tabata pa apenas 8 luna.
Mentalidad putri di AVP
Awe nos ta trece prueba dilanti di e “colebranan” di AVP cu a drenta Lotto cu un mision pa destrui hende cu placa cu no ta di nan (manera 3 MIYON malgasta na investigacion) y alabes haci negoshi y abusa personalmente di placa di Lotto. Bestuur a firma un besluit unda cada un a haya un Credit Card cu nan por gasta $10.000 US Dollar personalmente di cual Lotto mester paga tur luna. Tristo ta cu na final di 2017 net despues di eleccion e mesun sinberguensanan aki, Silvio Janga, Flavio Faneyte, Benvinda Da Sousa (casa di Desiree Croes di AVP), Antonio Kamperveen, Eli Kock, Arnold Le Grand pa nombra algun a cambia statutonan di Lotto pa nan mes keda sinta y sigui abusa di placa di Lotto. Canadian Bank Note ta mesun culpabel. Wel a yega tempo pa Husticia prevalece na Aruba y no por keda sconde tras di alarga un veredicto. Nos ta spera cu pronto husticia vence e mentalidad putri di AVP, Croes ta termina bisando.