Departamento di Asunto Economico, Comercio E industria pa medio di su unidad Exprodesk ta organisa conhuntamente cu sr. Tony van Veen di Disc Makers, e seminario ‘Global Music Distribution: How to reach more fans and profit from your music’ cu lo tuma luga diabierna, dia 9 di augustus 2019, for di 9:30 di mainta te cu 12:00 di merdia na Departamento di Asunto Economico, Comercio, y Industria, cu ta situa na L.G Smith Boulevard #160 den edificio di Sun Plaza, riba segundo piso.
Exprodesk como parti di su proyecto di Industia Creativo ta organisa e seminario aki pa tur musico cu ta desea di siña mas tocante e diferente plataforma di distribucion di musica digital. Sr. Tony van Veen lo papia riba su experiencia amplio riba e area di distribucion di musica digital y lo splica interesadonan exactamente loke nan tin mester (y mester haci) p’asina nan musica yega facilmente na tur e plataformanan grandi di ‘streaming’. Sr. van Veen lo papia tambe tocante con pa haci ganashi cu musica, publicacion y ingreso via ‘YouTube’, y otro formanan con pa aumenta e ingresonan di nos artistanan.
Sr. Tony van Veen a crece na Aruba y ta biba actualmente na Merca for di unda e ta fungi como e director general di e compania lider den e industria di fabricacion di musica, ‘Disc Makers’. Sr. van Veen ta un ‘Senior Executive’ cu mas di 30 aña di experiencia den liderazgo den diferente aspecto di e industria di musica y di medionan di comunicacion, incluyendo musica digital, fabricacion y operacion, derecho di autor, imprenta y distribucion.
Sr. van Veen a administra tambe CD Baby, Disc Makers, BookBaby, AdRev y Merchly. Su companianan a traha cu miles di musiconan, cineastanan y autornan pa yuda nan pone nan canticanan, videonan y contenido escrito riba mercado y internacional.
Exprodesk ta brinda di e manera aki e oportunidad na tur nos musiconan cu tin pregunta of cu kier sa mas over di e plataforma di distribucion digital, pa participa na e seminario aki cu ta completamente gratis.
Espacio ta limita. Pa e motibo aki nos ta pidi participantenan pa haci nan registracion na tempo. Segura bo cupo, via e link: https://www.surveymonkey.com/r/SeminarArubanMusicians of scan e QR Code:
Pa mas informacion por tuma contacto cu sra. Sharon Meijer via: [email protected] of por bishita nos website www.exprodesk.com of nos facebook page www.facebook.com/exprodesk pa registra.