Nos a tuma nota cu den nos comunidad tin hopi interes pa informacion relaciona cu temanan huridico di famia. Nos di PHP ta reconoce esaki y ta comprometi pa informa nos comunidad. Di e forma aki nos ta desea di contribui y tambe comparti contenido huridico cu tur esnan cu tin necesidad di esaki.
Tata biologico no ta tata den contexto huridico, mientras un tata pa ley no tur ora ta e tata biologico
Si bo ta tata biologico esei no ta nifica cubo ta tata den e contexto huridico conforme nos leynan familiar, ta importante pa tene esaki den nos subconsciencia. Tata biologico ta e ser masculino cu a duna su material genetico pa asina crea un bida. E simpel hecho aki no ta crea un laso familiar huridico entre e tata biologico y yiu.
Na momento cu un yiu nace den matrimonio esaki automaticamente ta crea un laso familiar huridico entre e yiu y su mayornan. Hasta den un caso si e yiu no ta e fruto di esun cu e mama ta casa cune. Den e caso aki e homber, aunke e no ta e tata biologico lo wordo considera tata pa ley. E scenario ta cambia completamente na momento cu no tin matrimonio entre e hende homber y hende muher. E mama pa e simpel hecho cu e ta duna luz na e yiu, ta crea un laso familiar huridico entre yiu y mama. Importante pa menciona ta cu entre tata y yiu no ta existi laso familiar automatico si e yiu nace pafor di matrimonio. E tata den e caso specifico aki mester reconoce su yiu pa asina crea un laso familiar entre su persona y e yiu. E dimension huridico aki ta regla den art 1:199 sub c BWA. E rekisito(nan) pa reconoce un yiu ta stipula den art 1:204 BWA.
Reconocemento ta trece cune diferente derecho y obligacionnan pabo como mayor. Ne mesun momento reconocemento dibo yiu no ta nifica cu tur cos ta regla. Por ehempel, pa bo ta e representante legal dibo yiu mientras cu e ta un menor di edad bo mester hasi un peticion apart pa obtene ouderlijk gezag (autoridad como mayor). Reconoce bo yiu y adkeri ouderlijke gezag ta dos dimension huridico cu mester wordo distingui. Na momento cubo reconoce un yiu esaki NO necesariamente ta nifica cubo ta adkeri ouderlijke gezag (autoridad como mayor). Den e articulo anterior nos a informa comunidad cu por obtene gezag via un decision di hues of pa medio di un peticion mutuo ‘gezamenlijk gezag’ di tanto e mama y tata.
Alimentacion Un di e implicacionan di reconoce bo yiu ta e obligacion pa cria bo yiu. Ley ta stipula cu bo tin un ‘onderhoudsplicht’ pa cu e mucha te na un edad di 21 aña. E base huridico ta art 1:392 BWA. Esaki ta encera cu abo como tata mester cumpli cu alimentacion pa cubri gasto di cuido, educacion y criansa di e yiu reconoci. Mas cu claro lo tene cuenta cu e capacidad financiero di e tata y e necesidad di e yiu na momento cu ta stipula e suma di alimentacion. Art 1: 395a BWA ta stipula cu e tata tin e obligacion pa cumpli cu alimentacion pa e yiu bou di 21 aña. E alimentacion ta pa alivia gasto nan di estudio y gastonan di subsistencia.
Derecho riba contact cubo yiu, informacion y consultacion Un tata tin e derecho y obligacion pa tin contact cu su yiu conforme nos ley nan familiar regla den art 1:377a BWA aunke cu esaki no tin ouderlijk gezag. Riba peticion di e tata huridico hues por stipula un areglo di contacto entre tata y yiu den bienestar di e yiu.
Conforme art1:377b BWA e tata tin e derecho pa wordo informa y consulta tocante desaroyonan importante regardando e yiu. E mama tin e obligacion pa informa y consulta e tata huridico tocante por ehempel trato medico, desaroyo na school di e mucha of situacion financiero pa locual ta trata e yiu.
Erfgenaam Door di reconoce bo yiu, e ta bira erfgenaam segun ley. Esaki nifica cu bo yiu(nan) ta bira bo herederonan ora cubo fayece. Na momento cu abo como tata fayece e yiu cubo a reconoce lo ta un heredero dibo. Esaki por solamente ora ta existi un laso familiar huridico. (art. 4:860 BWA)
Fam di e mucha
E fam cu e yiu lo bai carga ta depende di e scogencia cu abo y bo partner of mama di e yiu lo hasi. Basa riba nos leynan actual (art. 1:5 BWA) e mucha lo por haya sea fam di e mama of di e tata. Den e concepto di ley cu cambionan den nos codigo civil combinacion di ambos fam ta posibel, den e caso cu e mama y tata tin dos fam, e concepto di ley aki ainda no ta vigente. Esei kiermeen reconoce bo yiu ta crea e posibilidad pabo dune bo fam. (den un proximo articulo nos lo amplia riba e tema aki)
Nacionalidad Penultimo implicacion ta e hecho cu na momento cubo reconoce e yiu, e tin derecho pa asina adkeri bo nacionalidad saliendo for di punto di bista di un tata cu nacionalidad Hulandes e yiu tambe por adkeri e nacionalidad hulandes conforme rijkswet op het Nederlanderschap. Naturalmente pa adkeri nacionalidad Hulandes tin algun reqisito cu mester cumpli cune. Algun articulo cu ta relevante ta art. 3 jo. 4 jo. 6 RwN.
Tienda di Ley ta spera di por a informa ciudadanonan un poco tocante e implicacionan ora di reconoce un yiu. Nos a purba pa splica den lineanan grandi over e topico aki. Si acaso bo tin pregunta of duda, semper bo por aserca un abogado of hurista pa mas splicacion den detayes. E ta posibel tambe pa acudi tur diasabra di 3 pm -5 pm na cas di partido AVP na playa . Pa nos colaboradornan y huristanan den formacion e ta un placer di por atende e publico cu ta asistiendo tur diasabra.
Autornan:
Wendrick Cicilia & Gerick Croes Studiantenan di ley