E conocido narcotraficante Mexicano Joaquin Guzman di 62 aña lo keda pa resto di su bida tras di tralie. Esaki a keda conoci awe den oranan di merdia na momento cu ela ricibi su sentencia pa un Hues na New York.
Brooklyn, Newyork, Estados Unidos: Diaranson den oranan di merdia, El Chapo a keda sentencia no cu cadena perpetua so, pero riba e cadena perpetua ela haya 30 aña mas. alabes sin derecho di apela pa por sali prome cu tempo. Tambe corte a exigi pa El Chapo paga 12.6 biyon dollar. Esaki ta un calculacion haci, cu aparentemente esaki El Chapo lo a saca di gananshi for di e traficacion di droga.
El Chapo a keha di e trato cu e ta ricibiendo den prison na Merca y di su sentencia
Tur esnan presente tabata den suspension pa mira si El Chapo lo duna un declaracion, ela haci esaki via un traductor, ela keha di e trato cu ela haya den prison na Merca y a laga sa cu e sentencia cu ela ricibi di e corte americano, ta un tortura, psikologico, emocional y mental 24 ora pa dia. El Chapo a hiba palabra pa mas o menos 10 minuut den corte y tambe ela laga sa cu no tin husticia.
Tambe un di su victimanan cu a sobrevivi un atentado contra su bida, tabata presente y a dirigi su mes na e Hues.
Den presencia di señora Guzman, Emma Coronel Aispuro, e narcotraficante a scucha e Hues Brian Cogan cu nunca mas elo sali liber.
E sentencia aki lo ta final di El Chapo Guzman?
Tur cos ta mustra cu esaki Si lo ta e final di El Chapo. Pero e homber mexicano aki di 1 meter 68 ta conoci pa su astucianan cu e ta usa pa huy for di prisonnan. Na 2016 ela wordo deteni na Mexico y na 2017 ela wordo extradita pa Merca. Prome cu esey ela logra huy dos biaha for di prison na Mexico aparentemente elo a soborna e cuidadonan di preso. Na 2001 ela logra sali for di prison den un baki di paña y na 2015 door di un tunnel cu su secuasenan a coba bou di su cel.
Cas di El Chapo pa e resto di su bida, “Adminstrative Maximum Facility”, Florence, Colorado
Segun medianan mericano nan ta duda cu e biaha aki e lo por logra huy, e ta mustra imposibel. Elo sinta su castigo den un prison cu tin seguridad maximo na e districto di Colorado, E Administrative Maximum Facility (ADX) ta un ” supermax” prison, na Florence, Colorado. Den e prison aki tin e detenidonan mas peligroso di merca cera. Desde cu a construi e prison aki, te awe niun hende nunca a logra huy for di dje.
Na ADX Florence, tambe ta wordo yama ” Alcatraz of the Rockies”. El Chapo lo haya un lugar specialmente desiña pe cu unidadnan di control special, por bisa un sorto di prison den un prison.
El chapo lo pasa 22 ora pa dia cera den un cel di un persona, sin por tin contacto cu otro detenido.
Algun preso tin un television den nan cel, pero ta cierto programa so nan tin aceso pa mira, programanan cu por ofrecenan un educacion, ayudo spiritual of Psikologico. Netflix sigur no ta parece den e oferta aki. Tur cel tin un bentana so caminda e detenidonan por mira shelo so. E detenidonan no por mira otro for di nan cel.
Jury a haya El Chapo culpabel di 10 crimen
Despues di un caso cu a dura 11 siman, e aña aki, un jury a haya El Chapo culpabel di 10 crimen, cu ta varios di traficacion di droga, riba barco y den avion, benta di droga y di hiba un maneho di un organisacion Criminal, cu ta di e cartel Mexicano, Sinaloa Cartel, tambe pa diferente asesinato y labamento di placa.
El Chapo un di e personanan si no ta e persona mas rico di mundo
El Chapo ta wordo considera un di e personanan mas rico di mundo. Autoridad Mericano, lo bay trata na reclama tur e bienesnan di El Chapo. E conocido revista Forbes a yega di conta El Chapo como e persona mas rico di mundo.