Den luna di vakantie, IBiSA ta organisando un programa variabel cu actividad pa un bida activo y tambe con pa cushina saludabel, dirigi specialmente na nos hobennan.
E prome evento ta e caminata cu ta tuma luga den Parke Nacional Arikok dia 20 di juli proximo. Contribucion ta Awg 7,50 y e suma aki ta cubri e desayuno pa e hobennan participando. E trayecto ta di aproximadamente 1ora y na final di e caminata nan ta haya un dasayuno y algun tips di alimentacion balansa y saludabel. E “Nature Walk and Breakfast” ta sali pa 7’or di mainta for di entrada principal di Parke Nacional Arikok na San Fuego y e ruta ta den Cunucu Arikok unda por bay mira cas di Torto, dibuho di indjan y matanan cu sa wordo uza como remedi di tera y hopi mas. E caminata aki ta den man di e “parkrangers” di Parke Nacional Arikok unda nan lo guia y splica esnan participando e balor cu nos naturalesa tin pa nos como hende y eco sistema di nos isla. E actividad di fin di siman ta 1 di 3 actividad prepara pa e lunanan di juli y augustus. IBiSA su seccion di salud ta organisa y promove e actividadnan pa hobennan di 12 aña pa 17 aña.
Pa mas informacion por tuma contacto Sheryl Croes Arends na IBiSA, 582-4987, lider di e eventonan menciona.