Home Politics Parlamentario Endy Croes: Ta felicita Minister Glenbert Croes Den tempo di...

Parlamentario Endy Croes: Ta felicita Minister Glenbert Croes Den tempo di tormenta a logra baha desempleo di 8.9% (2017 AVP) pa 7.3% na 2018

SHARE

Parlamentario Endy Croes ta felicita Minister di Asunto Social y Labor Sr. Glenbert Croes cu a logra reduci e desempleo apesar den tempo di tormenta. Manera ta conoci e gobierno aki a hereda desaster financiero, un desaster social y un pais practicamente ingobernabel. Den e tormenta aki a percura pa lora manga di camisa y manera un team a traha un plan financiero cual a duna resultado den e promer aña y a traha tambe un plan social, esta e Crisis Plan Social. Sin hopi recurso pero si cu un energia positivo y un compromiso cu pueblo pa drecha nos pais Aruba a cuminsa mobilisa den tur area. 

 

Mike Eman a entrega e gobierno nobo un pais practicamente bancarota cu un desempleo di 9% y rond di 5000 hende sin trabou. Apesar cu Hulanda mediante CAFT y Protocol ta presiona pa baha gastonan di empleadonan publico y pues pa no tuma hende na trabou e gobierno aki a percura pa den e promer 16 lunanan di gobernacion logra baha e desempleo na 7.3%. Esaki sigur ta un logro grandi di Minister Glenbert Croes y su departamentonan concerni. Parlamentario Endy Croes kier felicita tur cu a contribui den un tempo dificil pa por logra esaki. Un rapport di DAO esta e AKO onderzoek cual ta para pa Arbeidskrachtenonderzoek a caba di wordo entrega na Minister Glenbert Croes dia 12 di juli ultimo.

 

E rapport aki ta trata di un investigacion hopi profundo riba tereno laboral y conclusionnan y cifranan realistico como resultado di e investigacion a wordo presenta. Mike Eman y AVP di acuerdo cu e rapport a laga un desempleo den hubentud di 19.4 % na 2017 y na november 2018 esaki a baha pa 16.2% den hubentud. Asina tin hopi informacion hopi valioso den e rapport AKO aki y den siman lo amplia hunto cu mas colega riba e tema aki. Pabien Minister Glenbert Croes cu e logro aki den corto tempo y den un tormenta bruto cu un pais ingobernabel. Esaki ta muestra di curashi y determinacion pa cu e compromiso cu pueblo.

 

Den e proximo dos añanan nos dilanti lo sigui traha duro pa baha mas ainda e cifra di desempleo y asina garantisa felicidad di nos Arubianonan creando e posibilidad y e plataforma pa nan por haya un trabou y por tin  un mihor calidad di bida y un bida decente y floreciente. Nos ta riba e bon caminda.