ORANJESTAD: For di diamars awor dia 16 di juli 2019 te cu diasabra 20 di juli 2019 Aruba lo bay disfruta di Weganan Internacional di Volleyball Femenino entre Aruba y USA Athletes International (USAAI) cu lo tuma lugar na Centro Deportivo Betico Croes (CDBC).
USA Athletes International (USAAI) ta un organisacion sin fin lucrativo cu ta ofrece e studiante-atleta e oportunidad deportivo unda e atletanan por participa den e deporte cu nan ta gusta ariba un nivel internacional y e oportunidad cultural unda nan ta siña conoce e cultura di otro paisnan. Despues di nan aña escolar e studiante-atleta tin e oportunidad pa forma parti di un seleccion di un deporte unda e studiante/atleta lo biaha pa exterior cu e meta pa siña conoce un otro pais y hunga/competi den nan deporte. Nan lema ta:
” bringing the world’s Athletes together through Sports and Education”
Esaki lo ta di 3 biaha cu Aruba Volleyball Association ta host e Team di USA AI cu ta forma pa atletanan hoben cu banda di nan programma cultural, social y educativo, nan lo practica y competi nan deporte di volleyball door di enfrenta nos Teamnan local.
(Esaki ta un potret di e ultimo seleccion di USA Athletes International (USA AI) cu a bishita Aruba)
E Team USA Athletes International (USA AI) lo enfrenta e Teamnan di Volleyball di Damas di Aruba cu lo ta Volleyball Positivo cu Coach Percy Phelipa; Gazelles Reunited cu Coach Igmar Ogenia; VENUM cu Coach Errol Yrausquin y CBN cu Coach Noralfa Eckmeyer.
E schedule pa e dianan di wega ta como lo siguiente:
Dia:
Diamars 16 di juli 2019: USA AI vs ARUBA
Diaranzon 17 di juli 2019: USA AI vs VENUM
Diahuebs 18 di juli 2019: USA AI vs VOLLEYBALL POSITIVO
Diabierna 19 di juli 2019: USA AI vs GAZELLES REUNITED
Diasabra 20 di juli 2019: USA AI vs CBN CENTRO DI BARIO NOORD
Tur e Weganan ta programma pa cuminsa pa 7:30pm di anochi na Centro Deportivo Betico Croes.
Aruba Volleyball Association ta haci un Invitacion na tur Miembro di AVA, e gran fanaticada di volleyball y Aruba pa bin presencia e intercambio amistoso di volleyball entre USA Athletes International y Aruba.
