Parlamentario Endy Croes ta cuminsa na bisa cu AVP a aumenta prijs di AWA cu 50%. Parlamentario Croes por a tuma nota di un articulo den prensa unda Mike Eman kier cuminsa haci locual el a haci na 2009 esta hunga cu e sentimento di pueblo.
Preguntanan haci na WEB
E articulo su titulo ta “Maneho di medida ta fomenta desigualdad economico”. Den e articulo aki Mike Eman a splica cu su gobierno esta AVP a logra baha prijs di awa cu 35% y prijs di coriente cu 15%. Mike tabata tin e pudor di bisa cu el a baha BBO na mitar. E sinberguensa no a splica si cu AVP mes a aumenta esaki bek y a entrega e gobierno nobo un BBO na 3.5%. (El a hay’e na 3% na 2009 y a priminti di lo “elimin’e”). Parlamentario Endy Croes, momento di a lesa e articulo di e lunatico manipulador Mike “Hannanias” Eman, mesora a bay busca su documentonan alrespecto contestanan di WEB NV na Parlamento. Manera ta conoci un Parlamentario por haci preguntanan por escrito na tur Minister haciendo uso di su derecho di acuerdo cu Artikel III.7 di Staatsregeling y artikel 59 di Reglement van Orde. Basa riba esaki Parlamentario Croes durante aña 2018 a haci diferente pregunta alrespecto WEB NV na e Minister concerni esta Minister Evelyn Wever Croes. Na su turno ta manda e preguntanan pa Gerencia di WEB y manera e ricibi contesta oficial ta manda esakinan bek pa Parlamento. Pa ta exacto 18 di september 2018 Parlamentoario Endy Croes a ricibi contestanan riba diferente pregunta haci na WEB.
Mike Eman ta manipula cu cifra
Un di e preguntanan na WEB tabata ta si Parlamento por ricibi un tabel cu prijsnan oficial di AWA y CORIENTE desde 2008 pa 2018. E tabel aki a yega Parlamento y Marlon Sneek (unico cu ta yega trabou de bes en cuando) tambe tin’e. Pasobra tur parlamentario ta ricibi e contesta y of rapportnan aki. Si Marlon a duna Mike esaki nunca pero nunca Mike Eman por a skirbi un disparate asina den prensa. MEP a laga prijs di coriente na un tarifa di Afl.0.2713 Kilowatt per uur. Na 2010 bou AVP esaki a alcansa Afl.0.4080 Kilowatt per uur cual ta un aumento di 50.4%. Na 2016 esaki tabata ta Afl.0.4031 esta un aumento di 48.5% den comparacion cu 2009 (MEP). Na 2017 momento cu pueblo a skop AVP for di gobernacion rapport di WEB ta indica cu e tarifa tabata na Afl.0.3681. Pues den aña di eleccion Mike a core purba bah’e un poco pero ainda e tarifa aki ta refleha un aumento di 35.7% den comparacion cu aña 2009 esta unda AVP a ricibi esaki for di MEP. Pues Mike Eman, aki bo careda di bina ta caba. Cu prueba di WEB den man nos por ilustra awe con MANIPULADOR y vies bo por ta. A yega momento pa pueblo haya sa tur berdad y ki ora bo papia of skirbi un mentira bo por conta cu nos lo contraaresta bo cu prueba y e berdad. Nunca pero nunca AVP a baha e prijs di coriente cu 35% manera Mike ta pretende y tampoco awa pero riba prijs di awa nos lo bin bek den un otro articulo. Alcontrario Mike y AVP a aumenta esaki cu averahe di 50% su promer añanan y cu 35.7% su aña final den gobernacion. Mike bay gaña baca!!!