Home Politics Prome Minister Evelyn Wever-Croes: Bienestar di nos pueblo ta na prome luga:...

Prome Minister Evelyn Wever-Croes: Bienestar di nos pueblo ta na prome luga: ARUBA LO MANTENE E FRONTERA CU VENEZUELA CERA

SHARE

 

 

 

Durante e conferencia di prensa di diahuebs mainta, Prome Minister a enfoca riba e tema di e ceramento di frontera cu Venezuela. E tema aki a trece hopi confusion y preocupacion den pueblo. Alabes, e ta keda un tema hopi dinamico cu hopi cambionan constantemente den e situacion aki y constantemente tambe Gobierno ta keda na haltura di tur informacion y cambio pa asina tuma e miho interes y decision den esaki.

 

Premier Wever-Croes ta enfatisa un biaha mas cu e situacion pa cu e frontera di Aruba ta igual. E frontera ta cera y por lo pronto Aruba lo mantene e frontera cera apesar cu tin peticionnan haci pa excepcion den e caso di transito cu ta wordo considera pero prome cu tuma decision y honra peticionnan, Gobierno di Aruba ta studiando y evaluando tur cos bon prome.

 

Gobierno di Aruba ta precupa pa cu e situacion di Aruba Airlines cu por resulta den perdida di trabou pa hopi mama of tata di famia. Pero na e momentonan aki, Gobierno di Aruba no por duna un simpel excepcion na prome luga pasobra no tin siguridad cu esaki lo scapa e aereolinea. E negoshi aki ta hopi dificil y cu hopi faceta pa tene cuenta cu nan pa cua motibo Gobierno di Aruba lo no tuma niun riesgo cu un excepcion di habri frontera. 

 

Na momento cu Aruba a cera frontera cu Venezuela dia 10 di mei, ni Boneiro ni Corsou mester a cera nan frontera pasobra ya Venezuela tawatin e fronteranan ey cera caba. Den reino e ora a bay delibera y aki ta na unda Corsou, Boneiro y Hulanda a pidi Aruba pa atende e tema aki conhuntamente. Durante e deliberacionnan aki a yega na algun punto di salida. E prome punto ta cu e frontera no por keda enternamente cera segun regla internacional pasobra Aruba no ta den guera cu Venezuela. Sinembargo tanten cu Venezuela ta den e situacion cu e ta, ta dificil pa Aruba keda cu “business as usual” cu Venezuela manera antes pasobra e situacion aki ta birando un peso hopi grandi pa Aruba. Pa e motibo aki a keda palabra entre Aruba, Corsou, Boneiro y Reino cu lo tuma tempo pa ta miho prepara pa acapara cu e fluho grandi di persona. Mientras tanto, e frontera ta keda cera. 

 

Tambe Gobierno di Aruba, teniendo cuenta cu no por tene e frontera cera pa semper, ta haciendo preparativonan pa si yega asina leu un dia Aruba por introduci e ESTA di Aruba, den cual un persona cu kier bin Aruba for di Venezuela, mester aplica pa un ESTA online, similar na e ESTA cu nos ta aplica pa bay Merca. Di e forma aki por controla miho ken y cuanto hende ta drenta Aruba for di Venezuela. E ley ta wordo prepara awo y tambe e sistema automatisa pa por maneha e ESTA. Gobierno ta spera cu e proceso di preparacion por keda cla den e siguiente dos lunanan. Tanten e ESTA no ta ‘in place’ Aruba lo no habri frontera cu Venezuela.

 

“E frontera ta cera y Gobierno di Aruba ta evaluando den ki otro forma por yuda e compania di Aruba Airlines como tambe otronan cu ta wordo afecta cu e ciere di frontera, entre otro e costo halto di fruta y berdura cu tambe tin pueblo preocupa y Gobierno ta buscando solucion pa cu esaki. E momento aki, e bienestar di pueblo di Aruba ta bin na prome luga. Aruba prome, e ora e frontera mester keda cera”, Prome Minister Evelyn Wever-Croes a enfatisa.