Home Police Nissan Skyline a core pa polis cu luznan paga, na final un...

Nissan Skyline a core pa polis cu luznan paga, na final un hoben a wordo deteni

SHARE

Yucuri – Diahuebs anochi algo pasa di 9’or a start un persecusion, esaki tawata den areanan di Santa Marta y Plantenrust. Polis tawata tras di un auto cu a nenga di para pa polis.

Tawata trata di un Nissan Skyline color blanco. E chauffeur a cuminsa core pa polis, bayendo den Santa Marta y despues drenta den Plantenrust.

Dado momento e chauffeur pa evita di wordo gara door di polis a paga luznan di e auto.

Helicopter e wowo den halto

Loke e no a conta cune tawata cu e Helicopter pa su mala suerte y pa suerte di e patruyanan tawata bulando.

For di e Helicopter nan tawata guia e patruyanan. Dado momento tawata tin poco confusion, pero esaki a wordo coregi mesora. Esaki tawata tin di haber cu e localisacion di e Skyline.

Despues di tawata core pa polis den e areanan anteriormente menciona, e auto a sali bay direccion Papilon y pa final bay scone bou un dak (garage) di un cas na Yucuri.

E chauffeur a baha y core bay sconde.

Mientras esnan den e Helicopter tawata sigui tur su trajectoria.

Na prome instante polisnan no a haye, pero un rato despues cu ayudo di e demas patruyanan cu a yuda den e persecusion a bin haya e hoben.

Ela wordo mesora deteni y transporta pa warda.

Pakiko e hoben no a sigui ordo di polis ora ela haye no ta conoci. Tambe e tawata asina ocupa coriendo pa polis cu e no tawata pone atencion ariba e zonido duro di Helicopter cu tawata sigui’e.

Pa loke ta e Nissan Skyline ela wordo confisca y hiba cu takelwagen pa Warda di Balashi.