Home Lifestyle Caribbean Reality Studies Center: INICIO DI INVESTIGACION NACIONAL RIBA UZO PROBLEMATICO...

Caribbean Reality Studies Center: INICIO DI INVESTIGACION NACIONAL RIBA UZO PROBLEMATICO DI DROGA Y ALCOHOL

SHARE
184660087

 

Adiccion di droga ta causa hopi inseguridad y problema social na Aruba. E ultimo dies añanan e situacion na Aruba a bira pio. Nos ta mira famianan kibra, un impacto negativo riba educacion di e generacion nobo y daño na nos productividad laboral. Tur hende cu tin un ser keri cu a cay den droga ta conciente di e problemanan social cu esaki ta trece cu ne y ta sinti e impotencia di no por haci nada. E noticianan ta mustra un efecto preocupante riba e pilar economico di Aruba cu ta turismo.

Como comunidad nos tin e obligacion pa atende e problema grandi aki, pa protege nos comunidad, pa evita cu nos hendenan mas vulnerabel ta bira victima y pa para e tendencianan actual cu por haci un daño ireparabel. 

E delaster investigacion nacional riba e impacto social di droga na Aruba a tuma lugar 22 aña pasa y ainda e ta wordo uza frecuentemente. Pero e situacion a cambia y a bira mas problematico, pasobra nos no tin e problema di adiccion bao di control. Tin necesidad pa haci un investigacion nacional actualisa y mas amplio pa por bin cu programa y proyecto efectivo pa reduci e impacto negativo di droga na Aruba. 

Awe ta anuncia e inicio di e Investigacion Nacional Uzo Problematico di Droga y Alcohol na Aruba, riba encargo di Ministerio di Turismo, Salubridad y Deporte y Ministerio di Asunto Social y Labor den cuadro di e Crisisplan Social. Caribbean Reality Studies Center, un centro di investigacion Arubiano cu 20 aña di experiencia, ta responsabel pa e investigacion cientifico aki, cu lo envolucra tur stakeholder riba tereno di droga. E investigado principal ta Dr. Glenn Sankatsing cu a haci e investigacion nacional riba e impacto social di droga na Aruba na 1997. Lo tin cooperacion estrecho cu tur organisacion cu tin di haber cu e efectonan negativo di abuso di substancia, cu prevencion, rehabilitacion y resocialisacion. 

E investigacion lo identifica e factornan di riesgo cu ta laga un persona bira un uzado problematico di droga of alcohol y cu ta lag’e cay den adiccion y aislamento social. Un uzado casual, cu tin biaha ta dal un drinks of uza un substancia prohibi no ta un problema social, si no tin otro factor di riesgo. E investigacion nacional aki lo concentra riba e uzado problematico di droga of alcohol, pa por identifica e causa y factornan cu ta haci un persona vulnerabel pa adiccion. 

Ta dificil pa haya respuesta valido cu un entrevista sensitivo di un uzado di droga. Esey ta e motibo pa haci e investigacion den dos fase pa cubri e tema cu un combinacion di investigacion mas chikito. E prome fase tin dies investigacion pa haci un diagnostico di e uzo problematico di droga y alcohol. E di dos fase tin shete investigacion cu ta studia e clientela di cinco organisacion di rehabilitacion y cu ta tr                   aha e historia di bida di 50 uzado problematico rond di Aruba, pa identifica e situacionnan di vulnerabilidad y riesgo. E resultadonan combina lo duna un bista completo pa por bin cu accion concreto. Finalmente, e resultadonan lo wordo presenta na tur instancia di gobierno y priva riba e tereno concerni, pa asina por haya feedback pa ofrece un strategia y programa di accion practico.

E enfoke central di e investigacion no ta combatimento di malesa, sino promocion di salud. Un curpa y un sociedad saludabel ta e mihor proteccion y prevencion contra malesa fisico y social. Ora nos a identifica e condicionnan social, cultural, sicologico y economico cu ta haci un persona vulnerabel of cu ta crea circunstancia di riesgo, nos tin un cuadro solido pa un strategia mas eficiente. 

E investigacion aki ta conta cu e cooperacion y sosten di nos comunidad cu ta conciente di e importancia di e tema aki. Particularmente lo envolvi instancia y persona cu tin di haber cu e poblema aki, pa haya nan cooperacion maximo. Cu e esfuerso di tur hende aki un aña nos por implementa un strategia basa riba e resultadonan di un investigacion cientifico cu por yuda nos reduci e impacto social negativo cu droga tin riba nos comunidad.