ORANJESTAD – Acaso cu Bo no tawata sa ainda: dia 5 di juli ta Dia Internacional di Bikini. E fecha aki ta marca historicamente unda na aña 1946 e prome bikini a wordo estrena door di Micheline Bernardine, inspira door di e diseñador Frances Louis Reard. E moda di bisti bikini a pasa su revolucion y awendia e ta masha popular. Bikini tin un variacion grandi y colorido pa bisti, entre otro ora di bay beach.
Pa conmemora e fecha aki, Aruba Tourism Authority a pone enfoke riba e mercado di Latino America y a uni su mes cu diferente diseñadornan Latino como tambe di Aruba pa genera un oportunidad di co-branding cu e marcanan renombra dentro di Latino America di bikini. Pa mustra e resultado final di e bikininan na prensa local, ekipo di A.T.A. Aruba, e ekipo di A.T.A. Latino America y invitadonan a presencia un desfile unda cu modelonan Arubiano a haya e oportunidad pa estrena e bikininan pa prome biaha.
Entre e diseñadornan ta nos propio y talentoso Gigiola Gomez cu su diseñonan floral y colorido. Na aña 2010 Gigiola a lansa su propio marca di paña y el a participa mundialmente den diferente evento di moda. Gigiola a presenta su coleccion nobo di bikini yama ‘Biento’. Acompañando Gigiola tawata e diseñador hoben Daniella Carrion representando su marca ‘Vitamin Sea’.
For di Argentina tawatin e marca Cipitria cu su diseñador Maylen Irigoitia y di Brasil nos por a mira e marca Aqua de Sal cu su diseñadora Fabiola de Oliveira Machado. Sebastián Del Real tawata e diseñador di Chile y pa Colombia e diseñador Adriana Dangond a presenta su inspiracion cu e marca MolaMola. Por ultimo nos por a admira Peru cu su marca Capittana y su diseñador María Daniela Núñez Dodero.Tur e diseñadornan a uza Aruba como nan fuente di inspiracion pa nan coleccion nobo di bikini y a uza e fecha specifico aki pa lansa diferente coleccion nobo. Elementonan di inspiracion entre otro tawata loke mas ta destaca di nos isla manera nos matanan di coco y palma, e colornan bunita en general di nos isla (pensa riba cas y edificionan, flornan etc), e flamingonan, e solo y e bahada bunita di solo, nos playanan, nos Faro Blanco y naturalmente e famoso mata di Fofoti.
PAKICO A SCOGE ARUBA PA TA ANFITRION?
Obhetivo principal di e actividad aki ta pa mustra e posicion di nos isla riba Dia Internacional di Bikini como un ‘One Fashion Island’ unda diferente diseñadornan di Latino America ta wordo inspira door di nos destinacion pa e desaroyo di nan creacionnan. Antesala di e actividad aki tawatin diferente photoshoot rond di nos isla cu modelonan internacional di Argentina, Brasil, Chile, Colombia, Peru y naturalmente di Aruba mes. Tawatin diferente embahadornan, celebridadnan como tambe e asina yama ‘influencers’ cu a bishita nos isla specialmente pa esaki, cual a haya un acogida grandi riba e rednan social. Entre nan tawatin e actriz Argentinero Emily Lucius, cu 411K followers. Di Brasil tawatin presencia di e modelo Priscila Uchoa cu 50.9K followers. Chile a wordo presenta door di e presentadora y socialite Valeria Ortega cu 145K followers. Di Colombia tawata presente e actriz y presentadora María José Martínez cu 190K followers. Por ultimo di Peru tawatin presencia di Daniela Núñez (The Velvet Secret) cu 116K followers.
PROPOSITO BUNITA
Loke a haci e campaña aki sumamento bunita y cu proposito ta e hecho cu a enfoca riba e asina yama bikini “twist”. E obhetivo tras di esaki ta pa durante luna di october, pa conmemora e asina yama ‘Pink Month’ unda ta promove e lucha contra cancer di pecho. Tur e diseñador y embahadornan ya menciona lo participa den e strategia ‘Twist’.
“Twist” ta un movimiento unda ta conscientisa e comunidad pa loke ta cancer di pecho, alabes e strategia di bikini Twist ta un forma di demonstra cu nos comunidad ta apoya tur ser femenino cu a lucha e bataya di cancer di pecho y ta duna bikini un otro perspectiva unda cu e ser femenino no mester tene berguensa, pero sinti comfortabel di su curpa.
Diferente diseñadornan ta trahando cu diferente instancianan cu na un of otro manera ta enfoca riba cancer di pecho y na momento di lansa e “Bikini Twist” den luna di october e diferente diseñonan lo ta na benta y un porcentahe di e benta di e potretnan lo wordo entrega como un donacion.
Asina ta busca manera pa crea conscientisacion y alabes Aruba ta ricibi e atencion como un isla diversifica den e mercado di Latino America.