Gabinte Wever Croes a bisa cu nos lo pone e ser humano central y nos lo pone atencion na necesidadnan real di nos communidad. Durante periodo di campanja, bishitando casnan na Washington un di e preocupacionan grandi tawata e hecho cu tin hopi caminda cu ainda no a wordo asfalta y e molester di stof ta hopi grandi. Tin un scol basico y un scol primario den e vencindario y tin un volume grandi di trafico den e area aki diariamente.
Na momento nos a drenta gobierno mi a haci un peticion na colega minister di infrastructura Otmar Oduber pa pone e carreteranan di Washington riba e lista di camindanan cu mester wordo asfalta. Mi ta contento y agradecido pa e cooperacion Brinda di colega minister Otmar Oduber pa asina percura pa e trabounan pa asfalta henter e bario cuminsa dialuna awor 8 juli 2019.
Un politico mester bisa den campanja loke e ta bai haci den gobierno y ora e ta den gobierno haci loke e la bisa e ta bai haci. Nos a haci e promesa na Washington cu nos lo percura pa pone asphalt y awe nos ta cumpli cu esaki tambe.
Nos ta dunando e districto di Noord hopi atencion den mehoracion di infrastrcutura. Di e forma aki nos a inverti pa construccion di un Boardwalk na Malmok pa nos localnan y turistanan por haci ehersicio na un manera sigur. A percura pa asfalta diferente caya na Alto Vista. Na mes momento a drecha tur e stashinan rond di kapel di alto vista y actualmente lo cuminsa cu e camindanan na Washington.
Nos ta un gobierno cu ta traha na biniestar di nos hendenan y esaki ta wordo demostra na decisionan cu nos ta tuma!
