Den cuadro di tin un organisacion sostenibel y prepara pa por duna un servicio di calidad na tur nos mucha y hobennan di Aruba, tur aña Fundacion Telefon pa Hubentud Aruba ta organisa ‘Deskundigheidsbevordering Dag’ pa asina keda duna training na su mentornan cu ta scucha, sostene y guia nos mucha y hobennan tur dia entre 2:00 y 6:00 di atardi.
Durante ‘Deskundigheidsbevordering Dag’ e mentornan ta ricibi training dirigi ariba un tema. E aña aki no tawata otro. E tema di e ‘Deskundigheidsbevordering Dag’ di e aña aki tawata: ‘Na un manera positivo’. A para keto ariba e importancia di educa positivo. E mentornan a ricibi training den Conscious Discipline for di sra. Helen Guda kende ta psicologo / instructor certifica di Conscious Discipline. Comprende un mucha/ hoben su estado mental y su reaccion ariba un situacion y comunica y guia e mucha/ hoben den su estado mental ta di sumo importancia.
Tambe e mentornan a ricibi un motivational speech for di sra. Tabitha Smith- Heemstadt tocante e tema norma y balornan personal y di norma y balornan di nos comunidad.
Di e manera aki e fundacion ta percura pa su mentornan sigi eleva nan nivel di conocimiento y experiencia pa por brinda servicio di calidad na e hubentud di Aruba.