Diabierna 5 di juli 2019, un grupo uni di comerciantenan local, cu ta emplea un cantidad di mas cu 10 mil trahado local gremionan a entrega un peticion colectivo na Minister di Finanzas y Economia pa reconsidera e implementacion di e ley pa laga BBO/BAZV/ BAVP for di resibo y warda te ora e reforma fiscal ta cla pa por evalua si esaki ta e miho opcion pa tur esnan envolvi.
Pa medio di un carta di karakter di urgencia ta urgi gobierno pa mantene BBO/BAZV/BAVP ariba recibo y no hasi ningun cambio. Comerciantenan uni a enfatisa na Gobierno cu nan no ta contra un reforma fiscal, pero si ta pidi mas transparencia como tambe voz den e proceso como tambe y pa envolve un representacion mas amplio di comercio den e discucion pa cu e reforma fiscal.
Desde un principio comerciantennan y organizacion nan a expresa cu e ley aki lo tin un efecto negativo hopi grandi ariba gastonan di operacion di nan negoshi, di cual no tur negoshi por carga mirando e situacion economico/financiero di Aruba y cu alabes ta crea incertidumbre cu lo wordo pasa directamente pa e pueblo consumidor.
Tur intento pa dialoga y bini cu sugerencia, proposicionan, y of solucion tabata en vano. Pues pa medio di esaki un biaha mas ta subraya e posicion di comerciantenan y alabes ta informa Gobierno cu e grupo aki cada dia ta birando mas grandi. Comerciantenan uni ta sali for di e punto di bista cu un economia saludabel ta uno cu ta refleha transparencia, responsabilidad y derechonan justamente reparti den e tres actornan esta Gobierno, comerciante y e pueblo. E ley aki ta den total contradiccion di pensamento aki. Apesar di a risibi informacion di tur banda y a wordo informa di cifras y analisis di e consequencianan pa consumidornan y comerciantenan, Gobierno ta ignora esaki y mantene un posicion firme y insistente treciendo un presion innecesario riba nos economia cu ya caba ta vulnerabel.
Ta di suma importancia pa pueblo di Aruba realisa cu e lucha aki NO ta solamente di comerciante y gremionan, e ta un lucha pa pueblo consumidor y trahador pues pa tur cu ta forma parti di economia, y cu tin derecho pa sa precies unda nan placa ta bay y na ken. E ley aki ta crea simplemente caos y extra gasto pa comerciante cual ta nifica desaster pa e pueblo cu mas lo sufri inhustamente.
Mirando e urgencia e importancia Grupo Uni di comerciante ta spera di risibi un reaccion den e proximo dianan for di Gobierno.