Despues di e bijeenkomst publico riba e tematico di SPO y Traimerdia, mi persona hunto cu coleganan Endy Croes y Hendrik Tevreden a haci bishita di trabao pa nos wak cu nos mesun wowonan con e situacion describi pa e trahadornan ta.
SPO Brazil
Durante di e bishita di trabao nos por a observa cu un scol recien traha practicamente no ta cumpli pa ta un scol di ofishi manera debe ser. E lokaal destina como werkplaats ta demasiado chikito y no tin ventilacion, klasnan ta demasiado chikito unda cu entre 10 pa 12 alumno no por bay den cada klas y tambe e problema cu riolering. No tin un gymzaal y conta cu pa falta di klas mester comparti e localidad di housekeeping pa lokaal tambe pa duna les. Y tambe nos por a wak cu e scol a desaroya su mesun material pa por duna les unda cu e nivel ta cuadra hasta pa alumnonan di klas 1 por pasa pa EPB nivel 3 si nan puntuacion ta bon pero e material no ta aproba pa inspeccion di enseñansa. Despues di e bishita mi persona a traha un reportahe di tur cos cu nos a topa y tambe nos conseho na Promer Minister di Aruba sra. Evelyn Wever-Croes.
Traimerdia
Mesun dia nos a pasa wak con un dia ta ser maneha na Traimerdia. Den esaki tambe nos a constata cu tin un programa y nos por a wak tambe e necesidad pa bin cu un sistema pa registra y tambe por traha riba e parti social na Traimerdia. Den esaki tambe nos mesun atardi a traha nos reportahe na Promer Minister di kico nos a constata pero tambe consehonan con pa mehora esaki.
Decision di Ministerraad
Nos di parlamento a haci tur locual nos por a haci como parlamentario pa trece trankilildad pero tambe pa trata pa tur proceso di cambio cana na un manera structura pero tambe concreto. Tur decision cu no ta concreto ta crea desconfiansa y sigur resistencia. Y tur conseho cu nos manda, nan ta keda un conseho y e unico autoridad pa tuma decision ta e Ministerraad cu ta consisti di 8 minister y ta den e reunion aki unda cu decision a ser tuma pa laga SPO Santa Cruz y haci esaki tambe hunto cu SPO Brazil un scol cu un curiculo di 4 aña. Banda di esaki Ministerraad a tuma e decision di aloca Traimerdia bao di Minister di Asuntonan Social sr. Glenbert Croes den bista cu lo percura pa traha riba e parti social y sigur tambe unda cu un proyecto cu antes nos tabata conoce manera FDEC por haya bida un biaha mas.
Ami sigur ta contento cu e decisionan tuma door di Ministerraad unda cu awor por traha na un manera mas concreto na un curiculo pa SPO Brazil y SPO Santa Cruz y alabes Traimerdia por mantene su formato y por sigui mehora esaki y percura pa e amplia den mas bario mirando su necesidad.
