ORANJESTAD – ‘Falta di educacion financiero’ hunto cu un deterioro financiero cu a tuma algun aña di aumento drastico den costo di bida y poco aumento di salario, a trece un estilo di bida unda awe, debe a basicamente bira algo structural. Hopi cuidadano ta presta placa pa por keda riba awa y ta presta placa pa paga debe. Esaki, segun Entrenado Certifica di Finansas di Lead2Success, Sr. Francis Groeneveldt
“E problema ta cu un ‘comportacion’ eroneo a crea raiz, el a tuma su forma y a literalmente bira un fortalesa. Esaki ta un abismo crea cu hendenan awor, mester wordo guiya con pa sali for di dje, si nan ta desea di mira un futuro financiero sano pa nan mes y nan famia. Y e ultimo aki, ta posibel,” Sr. Francis Groeneveldt ta bisa.
“Loke nos a tuma nota, ta cu hopi hende no solamente tin debe, pero nan tin’e di un manera caotico y structural. Nan debe varios instancia of persona. Un combinacion di banco, tienda y miembronan di famia of amigo. Y esaki tur hunto, a bira un montaña riba nan. Y door cu el a bira un montaña, nan no sa unda pa cuminsa – memey di ta coriendo un carrera mensual pa cubri nesesidadnan basico, y emergencianan cu ta aparece durante luna, – pa por cuminsa na sana nan situacion negativo di debe. Pa sana esaki, sali for di dje y inicia e construccion di un futuro financiero sano, na e punto aki, hendenan mester di guiya y ayudo.”
“Pa falta di guiya, tin hende cu ta te asta tuma riesgonan cu nan ta considera chikito, manera crea un otro debe cu un termino mas largo, pa soluciona uno cu ta urgente, of nos sa di situacionnan unda hendenan ta bay riesga loke cu nan tin, pa hunga weganan di placa, pa un ‘posibel’ ganashi. Nan ta termina di perde mas placa y algun ta asta haya un addiccion na weganan di placa. Na fin di dia, e ta un sentimento di ta carga, y nan mester di guiya y educacion, pa trece e ordo bek.”
“Nos a biba esaki, nos a mir’e rond di nos y nos a opta pa bay afo – den e caso aki, nos a bay Merca – y inverti pa por adkeri e conocemento nesesario pa sa con ta trata cu e situacion alarmante aki, cu awe nos hendenan ta biba aden. Liderazgo ta trata di permiti laga nos mes wordo educa, pa esnan cu a bay nos dilanti, cu a vence y ta reinando riba e teritorio. Pa por haci esaki, nos mester rindi nos mes, na un curiculo cu ta prueba di ta exitoso y sacrifica nos mes na un periodo rigido,” Groeneveldt ta splica.
“Den cuadro di esaki, Lead2Success a pone un programa den otro di 8 les, unda e cursista ta haya instruccion y strategia puntual cu ta saca nan for di un bida di debe. E ta e miho inversion cu por wordo haci den bida di un ciudadano cu debe, pasobra e ta trece un cambio den su bida. E curiculo aki, lo transforma su bida y bida di su famia, pa semper. E ta un inversion den un cambio di ‘comportacion,’ y una bez adkeri y bira doño di dje, ta automaticamente transferibel na tur cu cay bou di su conseheria – su yiunan, sea biologico of no, su famia, su ekipo, o sea, su influencia ta sin limite y e ta inmidibel.
“Aki nos ta papia di re-educa un nacion pasobra ‘comportacion’ ta hereditario. Pero nos por incicia cambio di ‘comportacion,’ y nos futuro generacionnan lo hereda ‘comportacionnan’ edificante y constuctivo. Y asina bo ta cuminsa cambia un nacion,” Groeneveldt ta bisa.
Corporate Social Responsibility
“Awo, no ta tur ora un ciudadano cu debe por inverti den su mes, esaki ta unda companianan mester sa di haci un diferencia den e maneho a nivel gubernamental di nos pais den e parti di responsabilidad social como compania, na ingles referi como, Corporate Social Responsibility (CSR). Recientemente, nos por a mira cu Nature’s Discount Nutrition Center, den cuadro di nan vision pa biba un bida saludabel y natural, a cuminsa den cas cu nan propio ekipo, door di provee nan ekipo un lectura pa mehora comportacion financiero,” Groeneveldt ta señala.
“Den cuadro di Nature’s Discount Nutrition Center su vision pa biba un bida saludabel, natural y bon balansa, esaki ta algo cu nos lo kier pa refleha riba nos propio ekipo tambe. Un reto cu hopi hende na Aruba ta biba cun’e ta e parti di sa maneha nan finanzas. Una bez, nos cuminsa maneha esaki, e ta trece ordo, trankilidad y paz den nos bida. Nos como Nature’s Discount Nutrition Center, ta desea di yuda trece e trankilidad aki den bida di nos empleadonan, cu na mes momento, tambe ta refleha den nan prestacion,” Sra. Iriana Werleman, di Nature’s Discount Nutrition Center a bisa.
“E team a gusta e lectura, e entrenado, Sr. Francis Groeveveldt a trece e material dilanti di manera hopi claro, comprendibel y asta e tabata manera un ‘eye-opener’ pa hopi di nan,” Werleman a bisa.
“CSR ta un termino amplio uza pa discribi un compania su esfuersonan pa mehora sociedad. Mirando e hecho cu mayoria ciudadano ta biba cu e typo di ‘comportacion’ hereditario aki cu por continua pa añanan largo mas nos dilanti – y cu ta responsabel pa e top 3 influencianan mas negativo den un sociedad cu ta, depresion, divorcio y separacion di famia – y ta cana drenta un organisacion hunto cu e empleado resultando den posibel a.o. y falta di nivel halto di produccion – e grupo di cuidadanonan den e organisacion, ta e miho caminda pa cuminsa e organisacion su
CSR. Riba e aspecto di ROI – Return On Investment, e compania su buelta di inversion, pa cu nivel di produccion y lealdad, lo mira su aumento. Den termino di negoshi bisa, e lo tin su situacion, win-win pa ambos partido, como tambe nos pais y su futuro generacionnan,” Groeneveldt ta subraya.
Den cuadro di esaki Lead2Success lo bay tin un anochi di introduccion pa su di tres curso di Financial Freedom dia 23 di juli, 2019. Curso mes lo cuminsa dia 6 di augustus 2019. E anochi di introduccion ta completamente gratis y lo tuma luga den sala di Hope Civic Center – situa riba di dos piso di Wendy’s Aruba/Cinnabon pa playa, for di 7:00 te cu pa 8:30 di anochi. Ta rekeri pa registra pa asiento via nan pagina di web www.lead2success.net of yama 5934543.