Nacionnan Uni a crea algun metanan pa crea un miho mundo pa aña 2030. E Metanan di Desaroyo Sostenibel, Sustainable Development Goals, SDGs. 17 meta cu a wordo stipula y Aruba, den e vision di Gobierno, a adopta e metanan aki. E Metanan di Desaroyo Sostenibel ta core den linea cu Gobierno di Aruba. Momento cu un pais adopta e metanan aki, y educa su hendenan riba e metanan, e pais por bin tambe na remarke pa fondonan pa yuda desaroya e metanan aki.
Un Proyecto hopi importante a wordo implementa e siman cu a pasa na unda cu a trece conscientisacion di e Metanan di Desaroyo Sostenibel, SDGs na scolnan. A traves di FUTURA, cu ta e fundacion di Gobierno pa encarga cu e parti di innovacion, como tambe di e oficina encarga cu SDG na Aruba, a desaroya un wega pa e scolnan. Esaki ta un ‘boardgame’ den forma di algo por estilo di ‘Mens Erger Je Niet’ of ‘Ganzenbord’. E wega tin dow y pion manera e weganan menciona. Si cay riba e areanan di pregunta, e mucha mester contesta e pregunta cu tin di haber cu e 17 metanan.
E scolnan bishita cu e wega di SDG tawata Princes Amalia, Colegio Ora Ubao y St. Aloysius School. Prome Minister Evelyn Wever-Croes a presencia e actividad aki na klas 6 di St. Aloysius School.
“Ta algo sumamente bunita di mira e muchanan asina entusiasma y contento naturmente di haci wega enbes di les aunke e wega mes riba su mes ta un bon les. Ta impresionante pa mira e interes cu e muchanan tin caba den e metanan aki di Nacionnan Uni.
E meta di e weganan aki ta pa cada mucha cu bay school cera conoci cu e metanan di Nacionnan Uni. Den curason di cada mucha ta biba e deseo pa cambio. E deseo pa haci algo miho, talves pa nan mes, pa nan famia, pa nan klas of pa henter Aruba of pa henter mundo”, Prome Minister a expresa.
For di e conbersacionnan di e muchanan durante e actividad di SDG, ya por sinti e entusiasmo y plannan cu e muchanan ya tin entre otro: con pa tene rond di nan cas limpi, pa percura cu no tin plastic, no tin sushi; con pa cuida y haci miho uzo di awa y no malgasta awa; con pa cuida medio ambiente.
“A traves di e weganan aki, e muchanan ta wordo introducI na e Metanan di Desaroyo Sostenibel. E metanan aki lo ta un exito solamente si tur hende para nan tras. Nos ta cuminsa cerca e muchanan, hibando innovacion y SDGs den e scolnan, pasobra ta a traves di nos muchanan, nos lo logra nos meta”, Prome Minister Evelyn Wever-Croes a duna di conoce.
