Tanki Leendert – Dialuna algo prome cu 7’or y 45 di anochi, ta drenta un informacion cu auto lo a dal un persona riba e caminda di Tanki Leendert un poco mas pabou di e rotonde Tanki Leendert, informacion adicional cu a drenta tabata bisa cu e persona ta un hende muhe y cu e ta benta ariba caminda.
Mesora a cuminsa manda polis y ambulance na e sitio. Enberdad na yegada polisnan ta topa cu un dama boca abou riba caminda, e dama tabata herida y tabata kehando di dolor na su cabes. Tambe nan ta topa cu e Autobus B 75, cual ta e auto cu a dal e dama.
Hopi lihe ambulance ta presenta na e sitio y despues di a trata e dama na e sitio nan a transporte cu urgencia pa hospital.
Segun algun persona na e sitio, e Autobus lo no a mira e señora crusando caya y a dal e. Tambe a constata cu e area ey e iluminacion no ta hopi cla y cu esaki tambe lo por ta un di e motibonan cu e chauffeur no a mira e señora crusando y a dal’e.
E trafico riba e caminda principal di Rotonde Tanki Flip pa Tanki Leendert a tranca formalmente debi na e accidente aki.