Parlamentario Alan Howell Ainda tin hende ta desea pa San Nicolas keda un ‘ghost town’

Parlamentario di Alan Howell papiando di e desaroyo hotelero cu finalmente despues di decadanan di ta wardando riba algo asina, finalmente lo mira lus di dia, ta cuestiona con tin hende cu ainda ni kier mira un desaroyo diferente pa San Nicolas.
E ta bisa “con ta posibel cu ainda tin hende ta pensa cu San Nicolas no tin derecho di tin un hotel 5 strea cu por pusha e desaroyo economico cu ta casi morto pariba di brug. Segun nan San Nicolas mester keda un “Ghost Town forever”. Awel mi tin mal noticia pa nan. Soon they will see and feel the change”.
Howell ta sumamente contento cu finalmente y danki na e tremendo trabou di Minister Otmar Oduber y Gabinete Wever-Croes, despues di añanan cu gobierno tras di gobierno a purba sin resultado, un hotel lo lanta pariba di brug.
Tabatin y tin ainda personanan cu ta purbando di stop e desaroyo aki pensando cu San Nicolas no mag di bolbe tin un desaroyo y tin diferente excusa pa purba transca e Proyecto, pero Alan Howell ta mustra cu awo e desaroyo lo sigui.
Na e momentonan aki e grupo di inversionistanan di e compania Three Rivers cu ta e desaroyadornan di e proyecto ta na Aruba unda nan a reuni cu diferente mandatario y ta realisando diferente tramitenan final.
E grupo aki a psa tur e screeningnan necesario y recientemente a haya aprobacion di Banco Central pa por transferi e fondonan necesario pa Aruba y asina inicia e construccion di e proyecto hotelero di 220 miyon.
Mientras tanto, traspaso di e tereno a tuma lugar diaranson mainta y diseño di e hotel a keda aproba pa DOW, cual segun por a compronde for di Minister Oduber, ta uno cu ta cuadra cu e medio ambiente di e area.
Es decir, tur cos ta cla y Howell ta cntento di por informa cu e aña aki e construccion di e proyecto hotelero lo cuminsa y asina despues di hopi decadanan San Nicolas lo haya un desaroyo nobo. “San Nicolas must rise up again! It’s our time!”