Hopi Venezolano, cu tabata desea di haci un peticion pa Asilo na Aruba, a wordo estafa miles y miles di florin door di aparentemente e sospechoso aki y of mas persona caso “Asilo Gate” ta bou investigacion y no ta descarta cu mas detencion lo por cay.
Bushiri: Diahuebs for di oranan trempan di mainta un team di recherche tabata atendiendo cu un caso, e caso di “Asilo Gate”. te den oranan di merdia a logra detene un persona mas den e caso aki.
E sospechoso yama Carlos C. ta un persona cu ta engañando Venezolanonan cu ta bibando na Aruba y cu kier pidi asilo na Aruba. E sospechoso lo tabata estafando e venezolanonan sumanan grandi di placa, engañandonan cu elo haci e tramitenan di peticion pa Asilo.
Un peticion cu nunca lo por pasa via e canalnan oficial di Gobierno, pa motibo cu manera ta conoci e persona mes mester haci e peticion aki personalmente y no por entrega niun peticion pa asilo via un tussen persoon.
Esaki ta e di dos detencion cu a cay den e caso aki, algun tempo atras a haci e prome detencion, Rudolf Gibbs, kende tabata un ex agente policial, aparentemente Gibbs lo ta wordo considera como cabesante di e “Asilo Gate”, tur e peticionnan cu nan lo tabata procesa tabata ilegal y nan no tin ningun autoridad pa entrega peticion di Asilo pa niun persona y na niun instancia. E investigacion contra e sospechoso Gibbs aparentemente lo a termina caba y actualmente e ta cera na KIA.
Recherchenan aparentemente lo tabata sigui Carlos C. paso e lo ta un persona importante den e investigacion aki. Despues cu autoridad a logra pone man riba Carlos, nan a compañe pa su cas na Bushiri, caminda nan a haci un huiszoeking, pasobra aparentemente elo tabata operando for di su cas. Autoridad a bay cu basta material, cu probablemente lo tin algo di haber cu administracion di e negoshi ilicito aki.
E prome informe tabata mustra Carlos C, tabata logra estafa e venezolanonan pa sumanan grandi, mirando nan desesperacion pa haya asilo na Aruba.
Despues cu basta denuncia a drenta cu e sospechoso aki tabata cometiendo hopi abuso contra e Venezolanonan, cobrandona miles y miles di florin pa haci e tramitenan pa e peticion, yenando un formulario di peticion pa asilo,cu e tramitador aki no por a ni entrega. Autoridad a bay over na detene Carlos C. como sospechoso di ta estafando e Venezolanonan aki.
Peticion pa asilo ta algo completamente diferente si compare cu permiso di estadia of permiso di trabou. Autoridadnan no ta descarta cu mas detencion lo por cay, despues cu nan caba di interoga Carlos C.