Home » BONEIRO Cft: “Bon comienso di Colegio Ehecutivo cu maneho di mehoracion necesario”

BONEIRO Cft: “Bon comienso di Colegio Ehecutivo cu maneho di mehoracion necesario”

by Admin
0 comment 52 views

 

Kralendijk – Durante su bishita di dos dia na Boneiro Cft a haci un yamada na Colegio Ehecutivo y Conseho Insular pa realisa e mehoracionnan necesario riba diferente tereno di maneho den e periodo di gobernacion aki. E comienso ta bon: cu e acuerdo di gobernacion Hulanda ta ofrece apoyo adicional y banda di esey Boneiro por haci uzo di e surplus di 2018 tambe. Cft a felicita Colegio Ehecutivo pa su enfoke decisivo den entregamento di e documentonan anual di 2018.

Colegio di supervision financiero di Boneiro, Sint Eustatius y Saba (Cft) a felicita Colegio Ehecutivo pa e mehoracionnan den e ciclo di presupuesto y hustificacion. Asina, por ehempel, a entrega na tempo e prome reportahe di kwartaal di 2019, cu e modificacionnan presupuestario corespondiente, y a elabora e cuenta anual di 2018, accountant a control’e y a present’e na Conseho Insular. Consecuentemente, ta spera cu lo entrega e cuenta anual di 2018 aproba pa Conseho Insular na tempo, esta prome cu dia 15 di juli, cerca Cft. Un mehoracion masha evidente, despues di dos aña consecutivo den cuanan a entrega e cuenta anual cu un retraso considerabel. Sinembargo, Cft a bolbe pidi pa paga tino pa presupuesta e entradanan di impuesto y e gastonan di personal na un forma realista.

Ehecucion di e acuerdo di gobernacion, cu Hulanda y Boneiro a cera na november 2018, ta den su prome fase. Ta fortifica e capacidad di ehecucion, entre otro, mediante uzo di asistencia tecnico den e maneho financiero y den un plan di mehoracion pa e organisacion gubernamental. Colegio Ehecutivo a presenta e proyecto di plan di mehoracion di e maneho financiero 2.0, cual lo mester ta cla na augustus. Cft a expresa su elogio pa esey y a formula su recomendacionnan. Durante e proximo periodo Boneiro lo perfecciona e plan di mehoracion mas ainda, di moda cu finalmente esey lo conduci na e declaracion aprobatorio di accountant pa e cuenta anual di 2021.

Durante su bishita di dos dia Cft a papia cu Gezaghebber, Colegio Ehecutivo, Conseho Insular, Representante interino di Reino y e Director di Programa di e Acuerdo di Gobernacion. Tambe a tene combersacion cu Bonaire International Airport N.V., Bonaire Holding Maatschappij N.V. y Tourism Corporation Bonaire N.V., den cualnan, entre otro, a pidi mas atencion pa mehoracion di gobernacion corporativo, incluyendo puntualidad pa e cuentanan anual y ekipacion completo di personal di e directivanan y e huntanan di comisario.

Diahuebs dia 20 di juni Presidente di Cft, Raymond Gradus, a tene un charla publico na Hulandes titula “Maneho financiero, supervision y participacion gubernamental”, den cual a splica importancia di supervision y di gobernacion corporativo pa un maneho financiero eficaz. Por consulta e presentacion den e pagina web di Cft: www.cft.cw.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio