Home » ARUBA TOURISM AUTHORITY TA ORGANISA E DI 35 EDICION DI ‘ANNUAL TOURISM CONFERENCE ARUBA’

ARUBA TOURISM AUTHORITY TA ORGANISA E DI 35 EDICION DI ‘ANNUAL TOURISM CONFERENCE ARUBA’

by Admin
0 comment 71 views

Oranjestad – Pa e di 35 aña, Oficina di Turismo ta organisa e ‘Annual Tourism Conference Aruba’ – ATCA 2019 cu ta tuma luga di 25 pa 28 di juni 2019. Lo conta cu mas di 40 participante di e mercado Norte America. E participantenan lo consisti di tour operators, representantenan di aerolinea y hoteleronan cu ta representa Aruba den e mercado Norte America como tambe representantenan di Aruba hunto cu miembronan di prensa.

Kico ta ATCA
E obhetivo principal di e conferencia ATCA ta pa brinda posibilidad pa reforsa e conocimento di Aruba na socionan principal y tambe pa traha ribe oportunidadnan cu por engrandece nos mercado turistico. Ademas, participantenan ta comparti practicanan cu ta exitoso, nan metanan strategico, y ta alinea cu A.T.A. su oficina na Aruba.

Conferencianan manera ATCA ta duna un bista strategico riba e aña binidero pa cu Aruba su mercadeo den exterior. Mirando cu e continente di Norte America ta Aruba su mercado mas grandi, un di e metanan desea pa e siguiente añanan ta pa mantene e cifranan igual pero pa nos destinacion por atrae esnan cu tin un entrada pa por paga un vacacion na Aruba y por laga mas atras den nos economia.

ATCA cu programa interesante pa su participantenan
Diamars parti anochi lo tuma luga un recepcion di bonbini na Renaissance Island na honor di e participantenan di ATCA cu palabranan di bonbini, entre otro di ehecutivonan di Aruba Tourism Authority, Aruba Hotel and Tourism Association y Aruba Airport Authority N.V.

E apertura oficial lo inicia diaranson mainta na Renaissance Convention Center. E participantenan lo atende e conferencia cu oradornan invita y invitadonan/ partnernan local unda lo ricibi un palabra di bonbini di Minister di Turismo Danguillaume Oduber y CEO di ATA Sra. Ronella Tjin Asjoe-Croes entre otro. Lo toca temanan manera e vision di 2020, Gateway 2030, Storytelling y Autenticity di nos producto Aruba. Anochi lo transporta e participantenan na San Nicolas, pa asina nan disfruta di un edicion di ‘Island Festival’.

Riba diahuebs e participantenan lo wordo hiba na Hilton Aruba Caribbean Resort & Casino pa asina participa na e vitrina (marketplace) turistico. E vitrina ta e parti mas importante di e conferencia ATCA, unda negociacion entre diferente partner local y di e mercado Norte America ta tuma luga. Aki ta profundisa y comparti informacionnan riba nivel di strategia y tambe iniciativanan di mercadeo enfoca riba inteligencia, innovacion e integracion.

E conferencia aki ta clausura diahuebs anochi na Plaza Boy Ecury cu un recepcion di despedida. A scoge e localisacion aki pa e monumentonan cu ta dedica na e heroenan Arubiano. Naturalmente, lo informa e participantenan tocante e historia di nos patrimonio.

Di e manera aki Aruba ta sigui engrandece y fortalece su lasonan, garantisando asina e crecemento den nos industria primordial cu ta turismo. Aruba Tourism Authority su enfoke ta pa obtene resultadonan positivo pa Aruba y cu plannan strategico den mercado pa keda semper innovativo y un paso dilanti di otro islanan den Caribe. ATCA 2019 ta un muestra importante di esaki!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio