29 di Juni Nochi di Pelicula na Parke Arikok

Oranjestad, Aruba – Dia 29 di juni Parke Fundacion Parke Nacional Aruba (FPNA) ta organisa su famoso Movie Night na Parke Nacional Arikok. Pa FPNA ta importante pa educa y concientisa e comunidad riba diferente aspecto di nos medio ambiente y sigur e impacto cu nos tin riba esaki. Un di e metodo cu FPNA ta huza pa educa y concientisa e comunidad ta su famoso Movie Night cu ta pasa casi tur luna di aña. Dia 29 di juni pa 7.30 PM di anochi lo pasa e prome dos episodio di e documentario Our Planet. E documentario aki ta adresa cuestionan di conservacion y ta presenta diferente animalnan den nan habitat. E enfoke ta riba e impacto di e ser humano riba e medio ambiente, specificamente e cambio climatico. E anochi aki lo pasa e episodionan cu ta One Planet y Frozen Worlds. FPNA ta extende un invitacion na e comunidad di Aruba pa asisti na e Movie Night na nos Centro di Bishitante y pasa un rato ameno hunto cu famianan. E anochi di pelicula ta completamente gratis cu posibildad pa cumpra algo di come y di bebe. Pa mas informacion por yama na 585 1234 of bishita nos pagina di facebook; https://www.facebook.com/arikoknationalpark