Home International Biahando pa Aruba of Corsou ilegalmente, pagando 450 dollar, un pasashi cu...

Biahando pa Aruba of Corsou ilegalmente, pagando 450 dollar, un pasashi cu por costanan nan bida

SHARE

Den dos luna, mas o menos 92 venezolano lo a perde nan bida den lama Caribe

La Vela de Coro, Venezuela: Den e ultimo dos lunanan tabata tin 3 boto cu aparentemente lo a sink y den cual di 92 venezolano lo a perde nan bida, asina e organizacion Internacional di Migracion (IOM) a duna di conoce. E organizacion aki ta relaciona cu Nacionnan Uni y ta pidiendo pa bin mas medida severo contra traficacion di personanan.

Boto bayendo direccion Corsou ta desaparece
Un di e tres botonan cu a desaparece a sali dia 8 di juni ultimo y tabata bayendo direccion di Corsou, ta teme cu tur 32 persona abordo lo a hoga. Un curpa di un persona masculino so a wordo haya, algun dia despues, esaki tabata drief den awanan teritorial di Corsou. E curpa a wordo confisca y autoridad na Corsou a saca potret di e curpa, e potret a wordo mande pa famianan di e 32 personanan perdi y asina nan a logra identifica e curpa aki. E curpa sin bida ta di Elio Rafael Ramones di 45 aña.

Dos boto bayendo Trinidad & Tobago a sink y un boto bayendo Corsou a desaparece
E prome boto cu aparentemente lo a sink tabata bayendo rumbo Trinidad & Tobago, abordo tabata tin 28 persona, esaki a sosode dia 23 di April ultimo. E di dos tabata dia 16 di mei tambe aparentemente lo tabata bayendo rumbo Trinidad & Tobago tabata tin 32 venezolano abordo y e ultimo tabata un boto sin nomber cu a sali dia 8 di juni direccion Corsou abordo 32 persona.

Te na e momentonan aki no por bisa si tur e personanan aki a hoga, famianan di e personanan aki ta keda carga nan speransa, pero no a tende nada mas di nan sernan keri.

Varios rumor y speculacion circulando na Punto Fijo, cu lo por ta trata di secuestro
Tin hopi speculacion y rumornan ta circulando na Venezuela, especialmente na Punto Fijo, cu aparentemente tin un of mas organisacion criminal tras di desaparecion di e boto aki. Rumornan ta circulando, cu e ultimo boto cu a wordo registra como desapareci,  no a sink, pero esnan a bordo a wordo secuestra, pa despista esaki, nan lo a tira un persona for di e boto, pa asina laga pasa cu nan tur lo a hoga. Segun e rumornan cu e personanan abordo ta na bida y lo ta secuestra, tambe nan ta kere cu muy probablemente e personanan aki ta wordo pa haci cierto trabounan. Tambe tin un rumor ta circula cu famianan di e personanan desapareci, ta wordo menasa si nan bay buska nan derecho of si nan bay prensa. Aparentemente e organizacionnan di traficacion di hende lo ta menasa nan.

E parti mas straño di e desaparecion di e boto aki ta, cu no a haya niun curpa mas ta drief y mucho menos resto di e boto of pertenencianan di e personanan cu lo por a drief den e lama entre Corsou cu Venezuela.

E botonan ta saliendo mas y mas for di La Vela de Coro y no Cabo San Roman
E botonan cu ta sali cu ilegalnan for di Venezuela pa bay Aruba of Corsou, ta sali mayoria bes for di  La Vela de Coro of Cabo San Roman, pero nan no ta saliendo hopi mas for di Cabo San Roman, ultimamente e salida di eynan a bira hopi peligroso, tin hopi pirata den e area aki. La Vela de Coro ta mas trankilo pa sali bay direccion Aruba of Corsou.

Capitan ta cobra 450 dollar actualmente pa cabes
E prijs pa crusa e pida lama aki, saliendo di La Vela de Coro pa  Aruba of Corsou, ta actualmente na 450 dollar pa cabes, e desesperacion di e venezolanonan ta birando dia pa dia mas grandi y tin te hasta ta perdiendo speransa cu un dia cos lo drecha y ta tuma desicionnan hopi drastico y ta paga e 450 dollar haciendo e traficadornan di hende miyonario. Den un viahe cu 30 persona abordo, nan ta cera 13.500 dollar. Baha nan tin ora leu for di costa exigi nan pa bula den lama pafo y den scuridad di marduga, tin cu nunca a yega di bishita Aruba of Corsou.

cargando speransa di yega Aruba of Corsou pa traha y manda placa pa nan famia por come
E desesperacion ta demasiado grandi, hopi Venezolano ta perdiendo speransa, nan tin famia cu ta pasando hamber, tin cuminda pero pa esnan cu tin entradanan halto, e inhusticia, actualmente e situacion ta asina horibel cu te hasta na Punto Fijo habitantenan ta coba den saco di sushi busca cuminda. Ora bo mira un mucha ta coba den saco di sushi ta coi un botter di ketchup bashi, e ta basha poco awa aden y bebe, ta kibra curason di hende. E sufrimento cu ta Reina na Venezuela entre e famianan pober, ta pone nan move shelo y tera pa yega na e 450 dollar pa sali bin nos direccion, cu e speransa pa no cay den man di autoridad local y pa pisa tera na Aruba of Corsou y haya un trabou, pa asina manda cent pa nan famianan pa nan por come, paga pa remedi, paga debe y cuminsa biba poco mas miho.

Desesperacion ta pone e Venezolano paga 450 dollar sin pensa riba e consecuencianan
E desesperacion ta pone nan paga e 450 dollar, sin pensa riba tur e consecuencianan cu e ta bin cune. Mayoria no tin e cantidad di placa aki y nan ta fia e placa aki, hopi biaha for di hendenan cu ta meti den cosnan ilicito of cu ta fia placa ilegalmente. E personanan aki ta hinka nan curpa y famia den debe, cu interesnan tin ora halto, pa por haci e viahe aki y cu tur e riesgonan cu e ta bin cune, entre otro nan por hoga of cay den man di autoridad local of den man di pirata.

E situacion na Venezuela ta hopi tristo, especialmente pa esnan cu mester biba di un salario minimo, of cu no tin ni trabou of pa esnan cu tin yiu y no tin entrada pa crianan.

E organizacion IOM ta haya hopi lamentabel cu asina hopi venezolano ultimamente a desaparece den lama Caribe. Desesperacion ta pone hopi hende tuma desicionnan robes cu por resulta den morto, desaparecion, secuestro etc etc.

Traficadornan di hende ta abusando di nan clientenan y ta probechando di e situacion
Segun e organizacion di Nacionnan Uni, e traficadornan di hende ta probechando di e situacion na Venezuela, abusando di hende y asina strikando hopi placa. E traficadornan ta pidiendo demasiado placa pa transporta personanan for di Venezuela pa Aruba of Corsou, nan ta usa hopi biaha botonan cu no ta apto pa transporta hende of subi lama grandi, nan ta yena e botonan cu demasiado hende y asina facilmente nan por bolter riba lama grandi.

IOM ta pidi pa e comunidad internacional tuma accion
Marcelo Pisani, encarga cu e organizacion IOM den e regio aki ta pidi e comunidad internacional pa tuma accion.

” Mirando cu traficacion di hende ta opera internacionalmente, nos mester traha mas coordina. Un bon cooperacion entre paisnan ta hopi crucial pa trata na soluciona e problema aki”.

Segun IOM desde 2015 mas di 4 miyon Venezolano, a bandona Venezuela, huyendo asina pa e pobresa cu ta reinando.

Cuanto Venezolano mas mester sigui huy for di nan pais? Cuanto mas lo mester perde nan bida? cuanto mucha y baby mas mester perde nan bida? Con hopi mas atras e pais aki lo mester bay? Pa ricibi ayudo. Cuanto tempo mas y kiko mas lo bay pasa na nos pais bisiña? Esaki lo keda un misterio cu den futuro lo mester wordo realisa.