Home » Vocero di AVP Melvin Tromp: Gobierno di integridad a transforma Parlamento den un circo di tres fraccion

Vocero di AVP Melvin Tromp: Gobierno di integridad a transforma Parlamento den un circo di tres fraccion

by Admin
0 comment 56 views

Integridad ta un palabra cu Gabinete Wever Croes y principalmente Prome Minister Evelyn Wever Croes a bin ta usando pa algun tempo caba pero mescos cu promesanan haci na pueblo durante di campaña, e nificacion di integridad tambe a wordo devalua formalmente.
Melvin Tromp di partido AVP ta mustra cu ora ta papia di integridad, ta dificil pa kere y pretende di ta integro, mientras cu e accionnan di e mesun Gobieno supuesto integro aki, ta bisa net lo contrario.
“Ta pa algun tempo caba por scucha Prome Minister papia di integridad, papia di hisa nivel di Parlamento, haci declaracionnan pa promove integridad y respet pero caminda en realidad a bolbe keda demostra cu tanto su persona como su Gobierno, ta promove integridad pero nan accionan ta liña recta contra di nificacion di e palabra aki.
Ya caba na cantidad di ocasion Ministernan di Gabinete Wever Croes a bolter e posicion di nan propio fraccionnan den Parlamento, mustrando cu esun cu ta manda den Parlamento, no ta e 12 miembronan cu ta sostene e Gobierno, pero Conseho di Minister.
Ministernan no ta worry cu amienda of cu mocionnan cu ta wordo entrega pa nan Parlamentarionan y ta haci loke cu nan kier y loke nan ta haya ta bon pero ta algo di spera ora cu e miembronan di e tres fraccionnan aki, ta pasa hopi tempo den oficina di Ministernanpa haya instruccion di kico nan tin cu haci of por haci.
Ya caba for di luna di november di 2018 a keda demostra cu Parlamento no tin nada di bisa pa loke ta e ley nobo di LAFT cu ta duna e Conseho di Supervision di CFT, un base legal ora cu tanto Prome Minister Evelyn Wever Croes como Minister di Finansa, Xiomara Ruiz Maduro, a firma un protocol cu Gobierno di Hulanda riba kico nan tin cu bay cumpli cun’e a base di loke Hulanda defini of e comision di supervision.
For di e tempo ey caba tur hende tabata bon na altura di kico ta bay pasa y kico tin cu pasa y ningun momento por a mira un of otro di e 12 miembronan di e tres fraccionnan, bin dilanti y informa Gobierno cu esaki ta inaceptabel.
Es mas, Conseho di Minister a sigui determina e forma di procede di e tres fraccionnan aki, ta bisa nan ora cu tin cu yama reunion y hasta a bay asina leu cu Ministernan mes ta traha preguntanan cu e miembronan di e tres fraccionnan aki tin cu dirigi na nan persona durante di un of otro reunion.
Durante tratamento di e ley di LAFT presenta pa Gobierno, Prome Minister Wever Croes a duna un splicacion bon cla di e situacion y kico e protocol cu el a firma tabata nifica y hasta colega di partido, Parlamentario Richard Arends a duna un splicacion al caso di e situacion cu a wordo crea pa Gobierno cu e protocol cu el a firma na november ultimo.
Sinembargo pa trata di scapa nan cara y no mustra manera un set di marioneta, e tres fraccionnan a presenta un amienda caminda Gobierno tin cu haci cambio den e ley presenta, sacando tur caminda cu tin Conseho di Minister di Reino skirbi, y pone Parlamento di Aruba na luga di esaki.
Kico ta resultado di e amienda aki, ta cu e Gobierno di e tres fraccionnan aki ta canando cu e ley bou di brasa, ta papiando cu Hulanda kico pa haci ya cu ainda e ley no a wordo oficialisa y no a bay pa Gobernado ainda.
Pues claramente Prome Minister tin e poder riba su tres fraccionnan y ta bolbe mustra e grupo aki cu ta Conseho di Minister ta dicidi kico ta pasa den Parlamento y no ta tolera ningun otro opinion, sea cu tin base legal pa esaki of no.
Un situacion realmente comico pero tambe sumamente tristo ora c’un Gobierno cu ta papia di gobernacion di integridad, ta mishi cu integridad di Parlamento cu mester supervisa su maneho,” Melvin Tromp di AVP a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio