Despues di casi dos aña ainda pueblo ta warda MEP cumpli cu “Ora Zero” pa e refineria di Aruba. Na momento cu Gabinete Mike Eman II a bandona gobernacion tabatin mas cu 600 trahado den refineria CITGO na San Nicolas. Awe tin no mas cu 80 hende so trahando ainda den refineria y nan tambe ta preocupa si nan lo keda cu nan trabou. Hopi hende a kere cu di berdad MEP lo a haci esfuerso extra-ordinario pa garantisa operacion di e refineria di Aruba.
Awe ta bisto y pueblo ta testigo di e gritonan populista di Evelyn, Glenbert y Andin cu nan lo percura y garantisa cu e refineria lo wordo habri pa cuponan di trabou y cu lo engrandese nos economia. Ki dia nos por cuminsa mira manera Prome Minister Evelyn Wever-Croes a bisa cu na momento su persona drenta den gobernacion tur e inversionistanan lo ta para den rij pa inverti den e refineria?
Te dia di awe, ya pa casi dos aña caba pueblo por mira cu e refineria dia pa dia ta bay atras y e gobierno actual no ta duna ningun prioridad real pa garantisa existencia di e refineria. Locual si ta bisto, y tur dia mas y mas ta birando un realidad, ta cu e acuerdo cu Evelyn Wever-Croes tin cu su partner politico POR, pa cera e refineria.
Incomprondibel cu un partido di 9 asiento ta wordo preciona dor di un partner di 2 asiento pa elimina un industria asina grandi cu ta contribui cu 15% (700 miyon) den bo economia y 125 miyon den caha di Gobierno, caminda salarionan riba averahe ta wordo paga na e trahadonan den un refineria y ta garantisa 5000 cupo di trabou directo y indirecto. Locual ta un hecho mas interesante pa e coalicion di MEP, POR y RED ta e bista cu e gobernantenan actual tin riba e tereno di e refineria na San Nicolas pa parti esaki entre sponsors di campaña y cultivacion di Marijuana, manera Prome Minister Evelyn Wever Croes mes a declara durante reunion publico den Parlamento. Hasta kier caba cu un compania estatal cu ta RdA y FMSA cu ta responsabel pa compra y distribucion di Gasolin, Diesel, Kerosin/Jetfuel pa aeropuerto y Fueloil pa WEB.
Esaki ya ta den discucion avansa, tumando luga den secreto y patras di cortina pa reparticion entre “Friends and Family”. Esaki sigur lo no benifecia e pueblo di Aruba, cu lastimamente na fin di dia lo por ta testigo di e maniobranan maligno di e coalicion MEP, POR y RED den gobernacion.
Awe e Gobierno di coalicion strategicamente kier duna tur otro hende falta pa purba sconde nan mesun incapasidad pa goberna y otro intencionnan robes cu lo no beneficia pueblo! E unico proyectonan cu e gobierno actual a sa di ehecuta ta persecucion politico y pone medida riba lomba di pueblo mientras tur e gobernantenan actual ta viahando rond di mundo riba custia di pueblo sin cualker resultado pa cu un krenchi di benificio general pa e pueblo di Aruba.
Wak por ehempel con a caba cu tur e proyectonan di energia alternativa cu lo mester a contribui na un rebaho real y sostenibel pa e prijs di awa cu coriente. Mescos ta conta pa e Proyecto di gas natural (LNG) entre Aruba y Gas Unie di Hulanda. Esaki no solamente lo a garantisa un rebaho den costo pa produci awa y coriente pero lo tabatin menos efectonan negativo pa medio ambiente y lo a soluciona e problema cu ta existi na Waf di Barcadera.
Wak tambe kico a pasa cu e exploracion di Gas y zeta den awanan teritorial y economico rond Aruba. Un proyecto cu perspectiva grandi cu alabes ta asina importante pa futuro di Aruba caminda miyones di dollars a wordo inverti dor y pa cuenta di multinationals renombra mundialmente.
For di momento cu gobierno MEPORED a tuma mando diripiente e exploracion di gas y zeta a caba na aros cu coco! Asina tin un cantidad di proyectonan di importancia pa e bienestar general pa e bida socio-economico di pueblo lastimamente a wordoboycotia y para riba orden di e gobierno actual! Pa falta di capacidad y ignorancia politiko e gobierno actual ta kere masden persicucion politico y simplemete pone medida riba lombadi pueblo! Esaki ta e cambio cu pueblo di Aruba a bin ta biba pa casi 2 anja caba! Supuestamente e hende lo tabata central.