ORANJESTAD, Aruba – Aruba Bank a introduci e proyecto di Good4theNeighborhood 10 aña pasa. Despues di e exito di añanan anterior, den cual a introduci e “Building Entrepreneurs concept”, e aña aki e tema lo ta un biaha mas Good4theNeighborhood (G4N) – Building Entrepreneurs 3. Lo por tuma maximo 50 studiante pa participa na e programa di 3 siman aki durante vakantie grandi.
Aruba Bank ta desea di duna hobennan di tur bario, e oportunidad di cuminsa cu nan mesun negoshi, siña e habilidad y principio basico di negoshi cual nan por uza den nan bida. E programa lo cuminsa dia 8 di Juli y termina dia 27 di Juli proximo. Studiantenan cu por participa ta di scolnan secundario, entre 13 pa 17 aña di edad. Registracion ta individual, pero eventualmente lo forma grupo di 5 studiante. Esunnan cu registra no por registra nan mesun grupo.
E studiantenan ta bini hunto den vakantie pa siña riba entrepreneurship den e Good4theNieghborhood headquarters na Aruba Bank Camacuri. Pa 3 siman largo nan lo ricibi trainingnan den oranan di mainta y mester traha riba nan asignacion. Lo bay tin varios “docente” pasando riba diferente topico. ‘Cada ekipo lo ricibi un budget pa nan lo traha cu ne y asina realisa nan producto cu nan a presenta ‘, Roxanne Croes Marketing Officer di Aruba Bank ta informa.
E obhetivo primario di G4N desde cu a lansa esaki na 2010 ta, pa mustra cu Aruba Bank ta e banco cu ta tin e bienestar di nos comunidad central. Tambe pa ta e proyecto mas grandi di e comunidad di studiantenan di Aruba, pa nan por desaroya nan habilidad di leadership, trabao den ekipo y termina e proyecto na ora y den e presupuesto aloca. “E obhetivo general di G4N 2019 ta pa entrepreneurship yuda e hobennan desaroya nan autoestima y un mentalidad nobo cu por impulsa nan riba e caminda di exito” Nataly Simmons, Executive Director di Aruba Bank ta afirma.
A move e proyecto cu tabata basa riba scol y a cambi’e pa individual. E exigencia ta cu nan mester ta studiante di scol secundario pa participa, pero nan no mester inscribi como scol. Pa registracion bishita: www.arubabank.com/campaigns/g4n2019.